Cuerpo policial di Aruba tin su personal atento pa e weekend venidero cual lo ta uno druk di Semana Santa. Campamento a cuminsa dia 25 di maart desde 12’or di merdia. E aña aki tin 224 permiso, cual ta seis mas hopi compara cu aña 2017 (218).
Desde e dia ey tur personanan cu tin permiso por a cuminsa arma nan tent of pone trailernan pa campa. Sea consciente y mantene bo mes nan e reglanan stipula pa campamento. Polisnan lo haci control diariamente pa mantene e orden publico y tambe pa percura cu tur persona ta cumpli cu nan permiso. Esaki ta segun e comunicado cu nos a ricibi di cuerpo policial Aruba (KPA). Tanto riba lama y tera polis lo tin controlnan diariamente. “Riba lama nos tin unidad maritimo cu lo percura pa e siguridad y controlnan necesario riba botonan y den caso di emergencia riba awa nos unidadnan lo ta atento pa yega mesora na e sitio pa brinda e prome ayudo. Tanto riba seadoo y tambe boto lo tin controlnan den nos awanan.”
E comunicado ta sigui bisa, ‘sea consciente cu biento duro e weekend aki banda di lama tanto na Baby Beach, Rodgers Beach, Eagle Beach y Malmok. Tira bista riba muchanan chikito band’i lama percura pa nan bebe hopi awa y tambe cuidanan di solo y percura pa tin supervision di mayor. Percura pa bo tin first aid kit cu bo pa cualkier emergencia. Tene na cuenta cu nos reglanan di trafico y mantene bo mes na dje. Celebra Semana Santa den famia y sernan keri responsabel y consciente’.
“Nos lo sigui percura pa siguridad di nos comunidad durante e weekend druk aki di Semana Santa.”
