Polis, City Inspector y Serlimar ta “ruim op de boel”

E districto di Oranjestad tin areanan di atencion pa loke ta autonan bieu y obhetonan manera frishider y stoof bieu, benta riba tereno publico of ta para putri den curanan di cas. Pa elimina e problematica aki, Cuerpo Policial, via di su Polis di Bario, a acerca Serlimar y City Inspector pa asistencia cu un “Christmas Cleanup”, cual ta cuminsa diamars pa 10or di mainta.

Polis di Bario pa Oranjestad, Robert Vos a nota durante di patruya cu tin hopi auto mal para riba trottoir y banda di caminda. Algun ta stroba personanan cu ta cana riba acera, unda cu nan mester baha y cana riba caya poniendo nan bida den peliger. Primeramente a manda carta pa tur persona cu un aviso cu mester hala e autonan for di caminda publico. A haci un inventario di tur e autonan cu a topa cun’e y tur hende a ricibi un periodo di gracia di un siman. Na fin di e 7 dianan, Polis tin derecho di bay cu e auto si e doño no tin tur documento legal na ordo, incluyendo keuring, seguro y su belasting/number di auto.

Polis di Bario Robert Vos a bisa cu mayoria di e doñonan di auto no a reaccion mes riba e carta y lo cuminsa diamars hunto cu Serlimar y City Inspector pa kita tur e autonan y otro obhetonan cu tin riba caminda publico. Lo ‘takel’ e autonan y hiba nan Parkietenbos unda Serlimar lo “crush” nan.

Tambe ta ofrece e servicio di kita autonan para den cura y obhetonan manera frishider y stoof. P’esaki mester haya permiso di e doño di cas. Tur esunnan cu kier haci uzo di e servicio aki por tuma contacto cu number di telefon 5273168 pa mas informacion.

Marlon Pieters, kende ta encabesa e departamento City Inspector a splica cu nan tarea ta pa motiva habitantenan den tur bario pa haci y tene nan barionan limpi. Bao di e nomber “Mantene bo bario limpi” ta inclui accionnan unda cu ta ofrece e habitantenan e informacion necesario y ta stimula nan pa sali y yuda haci nan bario limpi.

City Inspector a bisa cu Polis ta mas dirigi riba autonan bieu. Naturalmente no por drenta cura di cas di hende “zomaar” y haci limpi, pero si e persona kier asistencia e por tuma contacto semper cu DOW y/of Serlimar si acaso e no probecha di e “Christmas Clean Up” of tin otro cosnan pa haci limpi of kita for di den su cura. Lo por tin un prijs pa e asistencia aki, pero esaki no ta tur ora, tin ocasionnan unda cu ta haci un evaluacion y ta brinda e servicio gratis, dependiendo di e circunstancianan.

Michael Raymond, Operations Manager na Serlimar, a comenta cu e habitante di e cas por firma un “afstandsverklaring”, un acuerdo pa Serlimar bay cu e auto. Den caso di e “Christmas Clean Up”, ta Polis ta encabesa e proyecto y a haci un inventarisacion di cua autonan lo takel y hiba dump pa machica.