Manifestantenan a bolbe confronta cu Polis diamars anochi despues cu nan a haya sa cu varios di nan coleganan a keda deteni y lo enfrenta persecucion hudicial pa a organisa un ‘motin’.
Centenares di manifestante a mobilisa riba caya pafo di un Warda di Polis despues cu autoridadnan a aresta 44 persona acusa di organisa un motin despues di diadomingo anochi su protestanan. Polis di Hong Kong a bisa den un comunicado cu e manifestantenan a obstrui trafico, kibra heki y a daña borchi di trafico, alabes atacando polis cu piedra y rodnan di metal.
Manifestante Ken Chan a bisa cu e kier pa trahado di trein por splica dicon no a tuma medida dia 21 di juli ora cu gran cantidad di homber cu camisa blanco a golpia di un forma brutal varios persona paden di stacion di trein.
Gobierno di Hong Kong y autoridad central di Beijing a culpa manifestante pa provoca un confrontacion. “Con por permiti pa ataca persona den e plataforma, incluyendo mucha y hende grandi den e trein”, Chan a bisa.
Lorraine Lee, a bisa cu e interupcion di e metro ta un intento pa corda hende di e fracaso di gobierno pa haci inhusticia social, economico y politico. “Gobierno no ta evitando problema di nos sociedad. Pa e motibo ta usa diferente enfoke creativo pa corda hende kico ta pasando”, Lee a bisa.
Polis a tira gas lacrimogeno pa asina evita manifestante blokia e caminda di Hong Kong. Manifestante ta exigiendo un investigacion independiente di conducta policial na e protesta, cu segun nan ta abusivo. China ta acusa actor stranhero no identifica pa pusha e protestanan.
Vocero di Ministerio di Relacion Exterior, Hua Chunying, a bisa cu e gobierno central ta opone pa intento di forsa stranhero di interveni na asunto di Hong Kong.
