7jun, LW, vigilancia (4).JPG

Den e siman di e evento di Soul Beach Festival, Cuerpo Policial Aruba a percura pa extra vigilancia, uzando nan “Flex Team” pa brinda sosten y asistencia na e patruyanan regular den nan trabounan diario.

 

E maneho di Mando Policial ta pa promove mas “blauw riba caya” pa cual ta uza ekiponan special di Polisnan experencia y capaz pa maneha cualkier situacion dificil.

 

Parti di e control ta pa haci trabou di prevencion, pa cual ta elimina formacion di gruponan den areanan publico, manera rond di Cirkle K, Manuelito’s Bar, Hotel Bacarat y otronan. Asina cu yega topa cu grupo di hende aglomerando, ta core cu nan mesora di e sitio.

 

Den e siman cu a pasa a detene 2 sospechoso na Cirkle K, den posesion di droga. Tambe a atende un grupo di hende homber cu ta papia Spaño y tabata bebe publicamente riba caya den parkeerplaats di Cirkle K, pa cual a splica nan cu esey ta contra ley. Pero ora a revisa nan bon, ta resulta cu tur cuater a yega nos isla como “turista” pero cu a keda atras mas cu e tempo permiti, pa cual a detene nan y entrega nan na Warda nos Costa pa deporta nan di nos isla.

 

Durante e siman a core cu varios hoben cu ta aglomera den areanan publico y constantemente tabata topa cu sakitonan di droga, probablemente pa propio uzo. A controla varios localidad di custumber, manera ta Lekker Bar y De Olde Molen, specialmente riba nan orario di cera y pa percura cu asina e ora yega cu ta core cu tur hende for di eyden.

 

Kedamento habri mas laat ta causa problema so, manera ta un cliente cu a manda un boter riba auto di un wardado di siguridad di e bar/restaurant. Polis a detene mesora pa buracheria publico y destruccion.

 

Eagle Beach ta birando dia pa dia un luga pa topa y consumi alcohol, hopi biaha compaña pa musica duro. Polis a core cu tur esunnan para eybanda y manda nan cas mesora.

 

Diahuebs a controla na Carribean Festival, unda a detene recedivista “Barroso” pa posicion di droga.

 

Na tur a efectua 59 control y a topa cu cantidad chikito di marihuana, sakito di cocaina, cuchiu, sker, schroefdraai skerpi mula y tur a wordo confisca. E sakitonan conteniendo droga a keda entrega na e departamentonan concerni.