Ayera, Cuerpo Policial di Aruba a duna un update riba e caso di hit & run na Pos Chiquito, unda un persona a perde su bida dia 2 di december ultimo.
Segun polis a informa, diamars mainta despues di 8or, central di polis ta wordo notifica cu lo mester tin un auto laga atras riba un caminda di santo na San Fuego. A despacha un patruya na e sitio.
Na yega di e patruya ta bin topa cu un Hyundia I10 color blanco. Aki e patruya a pone recherche y BFTO na altura.
Despues di evalua e situacion, a bin resulta cu ta trata di e auto cu ta ser busca den e caso di hit & run di e accidente fatal na Pos Chiquito dia 2 december 2024 E auto a wordo confisca y departamento di Trafico a tuma e investigacion over.
Manera por recorda, dia 2 di december pa 7:30pm, central di polis a ricibi un melding di un accidente pisa riba e caminda principal di Pos Chiquito, na altura di e rotonde.
Segun informacion tocante e caso, un auto biniendo di playa direccion San Nicolas a dal un homber tir’e otro banda di caminda y a sigui core bay, lagando e homber atras. Despues, dos otro auto a dal e victima.
A avisa ambulance y polis cu urgencia, kendenan na su turno a cera caminda. E prome ambulance cu a yega e sitio a purba di duna e homber asistencia, sinembargo no por a haci nada pa motibo cu e tabata morto caba.
Dia 8 di december mainta, un poco prome cu 12or, polis a detene e chauffeur di e accidente fatal na Pos Chiquito. Ta trata di e homber S.R.J.T. naci na Aruba di 24 aña.
