Polis a paga mas di 1.3 miyon euro na abogadonan den e caso pa e aresto fatal di Mitch Henriquez na Den Haag na 2015, RTL Nieuws ta reporta basa riba cifranan ricibi di polis di Den Haag despues di un apelacion pa libertad di informacion. Esaki ta involucra solamente pago na abogadonan te cu mei 2018. E caso a keda finalmente completa siman pasa.

Mitch Henriquez, un homber Arubiano di 42 aña di edad, a keda aresta na un festival di musica na Den Haag na juni 2015 despues cu el a grita na polis cu e tabatin un arma y a punta na su parti intimo. E homber burachi a keda deteni pa cinco polis despues di varios advertencia. A usa un chokehold riba dje y despues el a fayece na hospital. Di e cinco agente involucra den su aresto, dos a bay dilanti hues eventualmente. Un a keda declara inocente na 2019. E otro finalmente a keda condena pa abuso cu morto como resultado pa Corte Supremo siman pasa. El a ricibi un sentencia suspendi di seis luna di prison.

Bufete di abogado Sjocrona-Van Stigt a cobra 1,309,380.96 euro di polis entre juni 2015 y mei 2019, segun RTL Nieuws. Esaki a involucra asistencia legal na al menos 26 agente di polis – e cinco nombra sospechoso, y 21 polis testigo. Despues di un demanda entrega pa Sjocrona-Van Stigt, Corte di Districto Central a duna veredicto na maart 2018 y Conseho di Estado a duna veredicto na augustus 2020 cu e cantidad di ora cobra y e suma pa ora cobra pa e bufete di abogado no mester a wordo revela. Como resultado, ta casi imposibel pa mira con a genera un factura di 1.3 miyon euro, segun e noticiero.

Pero tres veredicto cu a aparece recientemente si a mustra cu e asistencia legal na e tres agente cu a ser nombra sospechoso, pero no a bay huicio, a costa 215mil euro. Esaki a keda genera den e periodo desde morto di Henriquez na juni 2015 te cu a retira e caso den su contra na september 2016.

Sjocrona-Van Stigt a bisa RTL Nieuws cu e factura enorme ta splica pa e tamaño di e caso di Henriquez y e cantidad grandi di agente di polis involucra. “Nos oficina comprendiblemente mester a haci hopi trabao den e varios procedura cu a dura varios aña”, Arthur van Stigt a bisa e noticiero.

Polis ta considera ta nan ‘deber como dunado di trabao pa paga compensacion pa asistencia legal’, segun polis a bisa RTL Nieuws como contesta. Contestando si e asistencia legal aki por a ta mas barata, polis a bisa: “Nos ta paga back abogadonan cu ta usa tarifa fiho basa riba mercado y cu ta specialisa riba profesion di polis.” Polis no a duna ningun detaye pa e noticiero por evalua si e tarifanan cobra tabata en berdad basa riba mercado.

Otro abogado y cientificonan a critica e suma cu polis a gasta pa asistencia legal den e caso aki, yamando esaki ‘extremadamente caro’, un ‘desgracia’ y ‘husticia clasista’ den respuesta na RTL Nieuws.

“E tarifanan extremo aki ta desproporcional na e tarifa cu e estado ta paga abogadonan cu ta asisti hende pober”, Mies Westerveld, emeritus profesor di Access to Justice, a bisa e noticiero. “E balans ta realmente perdi entre un abogado pa un agente di polis – kende ta sospecha di un crimen oficial – y e abogado di un civil kende ta sospecha por ehemplo di asesinato. Esey ta hopi malo pa estado di derecho.”

“1.3 miyon den tres aña… esey ta realmente absurdo”, segun abogado Reinier Feiner, presidente di asociacion Hulandes pa abogadonan social VSAN. Un abogado asigna na un persona cu no por paga pa esaki pa un caso simpel apareciendo den corte di polis lo ricibi alrededor di 700 euro, el a splica. Pa un caso mas compleho, lo ta alrededor di 1,100 euro. “Den e casonan di corte mas excepcional y compleho, esaki por ta talbes 12mil euro. Cu un apelacion, 20mil euro. Pero no 1.3 miyon. Esey ta extremadamente caro.”

Richard Korver, kende a provee asistencia legal na mama di Henriquez, a ricibi alrededor di 50mil euro for di Conseho pa Asistencia Legal pa mita di 2018. Abogado Gerald Roethof, kende a asisti pareha di Henriquez, a ricibi 6,600 euro pa su esfuerso. “1.3 miyon ta un cantidad desgraciado di placa. Y gobierno a financia esaki. Otro sospechosonan no ta haya asina un presupuesto infinito pa contrata abogado y expertonan. Gobierno a crea un sorto di prome clase social pa su propio hendenan asina ora ta trata di ayudo legal. Mi ta kere cu esaki ta un desigualdad legal gigante”, Korver a bisa e noticiero.

Segun parlamentario di SP, Michiel van Nispen, e factura masivo pa asistencia legal di polis den e caso aki no ta consistente cu e reduccion den ayudo legal subsidia durante ultimo añanan. “Aparentemente tin un gran diferencia na Hulanda entre ayudo legal pa e ciudadano ordinario y pa un ambtenaar. Mi ta kere esaki ta hopi malo pa confiansa den gobierno”, Van Nispen a bisa RTL. SP kier haya sa di ministernan Ferdinand Grapperhaus di Husticia y Seguridad; y Sander Dekker di Proteccion Legal, pakico tabata necesario pa gasta 1.3 miyon euro riba asistencia legal pa agentenan di polis den e caso aki. “Mi tambe kier habri back e discusion tocante pago pa abogadonan social”, Van Nispen a bisa.