Polis a aresta dies persona na Reino Uni, Belgica y Malta pa supuestamente secuestra celular perteneciendo na celebridadnan Mericano incluyendo influencernan, streanan deportivo y musiconan pa horta nan informacion personal y miyones den cryptomoneda, autoridadnan a bisa.
Agencia policial di Union Europeo, Europol a bisa ayera cu ta kere cu e gang a hora mas di $100 miyon den cryptomoneda usando asina-yama atakenan di swap SIM. E atakenan aki ta involucra desactiva e SIM card di un celular, sea door di gaña e compania di telefon of usa un insider corupto, pa asina por transferi e number na otro card bao control di e gang.
E arestonan tabata resultado di un investigacion conhunto di polis Britanico, Mericano, Canades, Belga y Maltes, Europol a bisa.
Europol no a specifica e nacionalidad di esnan gara den e accion, pero Agencia di Crimen Nacional Britanico a bisa un dia prome cu a aresta ocho homber na Inglatera y Escocia. Otro dos a ser aresta anteriormente na Belga y Malta, Europol a bisa.
Ningun agencia a identifica e celebridadnan victima.
Investigadornan a haya cu despues di haya acceso na number di celular di e victima, nan por a tuma control di app of cuentanan door di solicita codigonan pa reset password manda via SMS. Di e forma aki nan a logra horta hopi placa, cryptomoneda y informacion personal, incluyendo contactonan sincronisa online, como tambe hack den y post riba cuentanan di rednan social, Europol a bisa.
Europol a adverti tocante SIM swap como un menasa cada bes mas grandi siendo ehecuta pa estafadornan.
