Polis a detene un persona ilegal nacionalidad Venezolano riba rif

Diariamente Polis Maritimo, uzando boto, waverunner y nan jeepnan, ta patruya sea riba lama como na costa di nos isla, den un esfuerso pa controla varios ilegalidad, entre otro traficacion di hende. Awe mainta esaki no tabata un excepcion y durante patruya a gara un hende homber ilegal riba rif.

Ta asina cu durante patruya, a notifica Polis cu tin un homber cu ta papia Spaño scondi riba rif na altura di Barcadera. Ora Polisnan Maritimo a yega riba rif, berdad a topa cu e homber aki, kende a identifica su mes como L.C.A.A., naci na Venezuela di 23 aña di edad. El a conta cu pa 5:00am un boto Venezolano a baha 3 hende riba rif y a bisa nan pa nan mes landa bay tera. Dos di nan a tuma e riesgo y a landa bay tera firme, pa cual esun aki a keda warda pa nan manda un boto bin busca su persona.

Pa 1:00pm el a keda deteni relaciona cu estadia ilegal riba nos isla y a pas’e pa e departamento concerni pendiente su deportacion. Cu e informacion cu 2 otro persona ilegal si a logra landa bin tera ta haci cu investigacion a inicia awor pa busca nan paradero.

Cuerpo Policial Aruba ta contento di por conta cu e cooperacion y sosten di comunidad den e lucha pa combati ilegalidad. Den esaki ta pidi tur hende cu por sa di movecionnan di hende ilegal of di yegada na costa, pa yama 100 mesora pa por mobilisa Polisnan den e area pa gara e anti social nan aki. Comerciantenan cu ta emplea ilegal mester ta consciente tambe di e consecuencianan den ley, cu por conduci na multanan halto.