Tabata diahuebs pa mas o menos 4:30am cu Polis a haci “huiszoeking” y a detene nos menos di 5 sospechoso en conexion cu e caso cu a haya e nomber di GENTE. Ta trata aki di un caso cu e departamento di droga di Polis ta investigando pa un tempo caba y ta sinti cu tabatin suficiente prueba riba mesa pa convence Ministerio Publico pa bay over na detencion.
Ta bon pa menciona cu durante e buskeda den e casnan marduga, a logra haya droga, den forma di cocaina y marihuana. Polis a bay cu tur y a tuma nan den confiscacion.
Ta acusa e sospechosonan di a viola nos ley di droga “LVM” articulo 1. E sospechosonan ta: E.P.P. naci na Aruba dia 07-02-1989 y ta biba na Madiki Kavel; S.R.A. naci na Aruba dia 06-09-1996 y ta biba na Tanki Leendert # 165, G.E.T.D. naci na Aruba dia 04-01-1987 y biba na Barcadera y e señora E.M.P. naci na Aruba dia 26-1-55 y tambe biba na Madiki Kavel. Despues di interogacion, riba ordo di Fiscal a dicidi di encarcela tur e sospechosonan pendiente e investigacion andando.
Mester menciona cu durante e mesun investigacion aki a efectua un detencion mas, un sospechoso femenino, di inicial A.M. naci na Aruba dia 19-09-1979 y cu ta biba den Papayastraat. El a admiti su culpabilidad den e caso y despues di interogacion e por a bay su cas numa.
Cu e caso aki por mira un biaha mas cu Polis ta trahando den forma structura pa investiga gruponan cu ta haci nan mes culpabel na crimen organisa, den e caso aki un grupo envolvi den benta ilegal di droga. No por descarta cu lo tin mas detencion den e caso aki.
