Polis a detene 7 chauffeur burachi despues di Jouvert Morning

Manera ta sosode tur aña, diasabra mainta e ekipo di Unidad di Motorcycle di Cuerpo Policial Aruba a tene un control preventivo riba chauffeurnan bou influencia di alcohol despues di “Jouvert Morning”. Esaki despues cu a promove pa algun dia caba pa percura pa tin un persona cu no ta bebe alcohol, pa stuur despues di e evento. Esaki sin duda ta evita chauffeurnan burachi cu por causa accidente riba nan ruta pa cas.

A tene varios control, entre otro na altura di Pos Chikito, na altura di ex Drive-Inn Theater, riba Sero Teishi, riba e caminda grandi di Savaneta y hasta riba e caminda di Kibaima.

Tipo di control asina, na luganan strategico, semper ta duna bon resultado. No solamente den cantidad di multanan den e parti represivo, pero mas cu esey, den parti preventivo e ta yuda conscientisa automobilistanan pa baha velocidad y pa miho comportacion den trafico. Mas motorcycle di Polis cu zwaailicht cendi coriendo memey di autonan of para banda di caminda, miho e comportacion ta di e automobilistanan rumbo pa cas despues di algun ora di goso y alegria.

Despues di algun ora di control, a detene no menos di 7 automobilista, cu a supla hopi mas di locual ta permiti, pues e nivel di alcohol den nan rosea a surpasa limite di normalidad y di locual ta aceptabel pa ley. Di e chauffeurnan deteni, por bisa cu 4 tabata hende muhe y 3 tabata hende homber. Por menciona cu ora a hiba nan Warda di Polis pa haci un control mas precies riba e mashin grandi di midi nivel di alcohol den rosea, a resulta cu tur a supla riba 570 ug/l cu ta nifica cu ta kita e rijbewijs di e chauffeur.

Particular den e grupo di 7 chauffeurnan burachi ta cu 2 di nan no por a ni mustra un rijbewijs, pues no ta sigur mes cu nan tin rijbewijs. Un di e detenidonan, un chauffeur femenino, a supla riba 1000 ug/l, cu ta nifica un nivel abnormal di alcohol den su rosea!

E tipo di control asina lo continua despues di tur parada grandi di carnaval. Ta sugeri tur grupo, pa percura pa tin un persona serio y responsabel cu lo percura pa stuur pa esunnan cu ta bay pa bebe alcohol. Asina nos tur ta yuda haci nos trafico mas sigur y evita accidentenan innecesario.