Relaciona cu e investigacion andando ainda den e caso di asesinato cruel cu a sosode dia 20 di maart 2015, awe diabierna Recherche a detene e sospechosonan S.C.J. Martina y E.J.M. Herreira. E detencionnan a bay compaña pa “huiszoeking” cu a duna masha bon resultado.
E caso di asesinato mes a tuma luga dia 20 di maart 2015 ora cu mainta trempan a bin topa cu un curpa sin bida, tur na sanger, den un auto na altura di Indian Rock Garden banda di pia di Hooiberg. A identifica e victima como Lyandro “Lalo” Webb naci dia 29 di juni 1991, pues di apenas 23 aña di edad. E victima tabata un conoci di husticia y tabata den un of otro gang di Madiki.
Desde e dia ey Polis a detene varios sospechoso y a busca den diferente cas. A scucha varios testigo den e caso lamentabel aki y por corda cu a sigui varios acontecimento y losmento di tiro den barionan, tur liga na e mesun asesinato aki.
Fuente informacion comunicado KPA
Relaciona cu e caso, Recherche a haya permiso di Hues Comisario pa busca den 3 diferente cas awe mainta. Mester menciona cu den un di e casnan a haya un cantidad di droga, cu consecuencia cu na e cas specifico ey a detene e sospechoso E.A. Herreira y V.P. Palacio Cano tambe, no pa e asesinato, pero si pa e droga encontra.
