Tripulantenan a pasa di victima pa sospechoso
Tabata diamars 16 di februari 2016 rond di 4:50pm, cu Guarda Costa di Caribe Hulandes a yega waf di carga na Barcadera cu 8 tripulante di un boto di fruta Venezolano, cu a zink pazuid di Aruba. Pero no a dura mucho cu e escenario completo a cambia di un accion di rescate humanitario den un investigacion penal!
For di otro instancianan hudicial a drenta informacion cu Helicopter di Guarda Costa di Caribe Hulandes, cu tabata patruyando, a mira e boto di fruta aki na 4 miya nautico pazuid di Aruba y cu a mira nan lastrando un bulto grandi nan tras. Ora e tripulantenan a mira e helicopter nan a corta e cabuya y a nota con nan tabata corta e dek di e boto y a mira nan tirando paketenan den lama. Tabata hopi obvio cu nan a haci tur lo posibel pa zink e boto.
Polisnan Maritimo e ora a detene henter e tripulacion, cuminsando cu e capitan di inicialnan A.J.R.V, naci na Venezuela di 37 aña di edad, e “machinist” di inicialnan T.J.L.Y., naci na Venezuela di 28 aña di edad, F.J.B.P., naci na Venezuela di 41 aña di edad, R.A.R.G, naci na Venezuela di 28 aña di edad, L.I.G, naci na Venezuela di 42 aña di edad, N.R., naci na Republica Dominicana di 40 aña di edad, E.D.G., naci na Republica Dominicana di 45 aña di edad y Y.C.V., naci na Colombia di 25 aña di edad.
E prome investigacion ta mustra cu algun dia pasa e boto a sali for di Punto Fiho, Venezuela cu intencion pa pisca cerca di Aruba. Pero, autoridadnan Policial ta sospecha, a base di e nacionalidadnan abordo y e forma con nan tabata bisti, cu e cargacion di droga tabata destina pa Republica Dominicana.
Na tur, Polisnan a conta no menos di 324 pakete di un kilo di cocaina. Asina mes awe Polisnan hunto cu Guarda Costa di Caribe Hulandes a patruya den e area buscando e boto cu a zink y pa mira si por tin mas paki di droga cu ta drief eybanda of cu lo a bay den fondo di lama.
Cu e hayazgo grandi aki, autoridadnan hudicial ta dal baho mundo un sla masha duro aki, aunke cu ta sospecha cu e lote di droga no tabata destina pa nos isla. No ta conoci ainda si e barco a sali for di Aruba y cu e droga ta procedente di nos isla of si el a sali for di Venezuela carga y tabata rumbo pa Republica Dominicana y ora cu nan a sinti cu a gara nan, a opta pa core zink e boto. Probablemente nan lo a imagina cu asina lo no a descubri e lote di droga. Nan no a conta cu e cutter Panter a yega asina lihe y a topa cu tur e pakinan di droga.
