POH (Praktijkondersteuners Huisartsenzorg) ta duna splicacion di e servicio cu nan lo duna pa asina pashent keda pendiente. Tambe ta recorda pashent pa bebe nan remedi y tuma cualkier precaucion necesario.
Jasmira Mora Garces, coordinador di POH na Wit Gele Kruis, a informa cu a dicidi di haci esaki conhuntamente cu dokter di cas pa evita aglomeracion. Mayoria di nan pashent ta hende grandi, pues ‘nos no kier nan riba caya’.
Di e forma aki, nan ta evita hinca nan mes den situacion cu ta peligroso pa nan salud. Pa e motibo aki, conhuntamente cu dokter di cas lo traha via cas. Nan a cancela tur consulta cu tabatin cu pashent.
“Nos ta di POH cu ta yudando den e lucha contra COVID-19 pa asina por tine mas duidelijk. Nos ta bezig cu e call center, tambe cu DVG, pa asina nan yuda nos comparti e informacion di COVID-19 y e puntonan di atencion cu mester”, Mora Garces ta comparti.
Un di e puntonan cu a informa ta e pashentnan diabetico cu ta den risico. Nan ta stimula tur pashent pa zorg nan tin nan remedi up to date. Si tin pashent cu nan ta wak cu nan remedi ta yegando pa un siman, of nan ta den caba, ta sigura pa nan yama dokter di cas, kende ‘nan ta trahando ainda’.
Esey ta e manera cu nan ta crea facilidad pa asina por comunica cu dokter di cas, di un manera pa nan por yama e number y pidi pa nan receta por wordo manda botica. Tambe tin e facilidad di botica cu ta haci entrega na cas.
“Pa e pashent cu ta sufri di curason tambe nos ta pidi pa nan sigui bebe nan remedi. Nos ta pone enfasis na e pashent pa keda bebe nan remedi normalmente. No mester un stock grandi pasobra esey tampoco no ta e intencion”, el a bisa
El a bisa cu tin cu keda zorg pa salud. Esnan cu tin machine na cas mester keda check esaki constantmente pa midi. Tambe ta bisa pa persona cu malesa cronico come saludabel. E ta compronde cu awo por ta dificil pa motibo cu hende a cumisna perde trabou, pero purba di wak pa come fruta cu berdura. Ta conseha pa keda bebe likido y sin lubida e parti di haci ehercicio. “Nos sa cu nos tin toque de queda anochi. No ta bedoeling pa aglomera pero si keda activo. Por cana banda e cura di cas pa ta mas trankilo, tin hopi opcion, pero importante ta pa keda haci movecion.”
Mora Garces ta enfatisa pa hende no keda henter ora na cas sinta ta come. Pa cualkier pregunta, e ta bisa por tuma contacto cu nan via Facebook. Yama na 280-0101 pa perosna cu tin sintoma di COVID na e momento por haci uso di e liña.
Pa comunica cu POH por yama nan dokter di cas. Mora Garces ta comparti si cu tin algun POH cu ta duna nan mesun number di whatsapp, pa asina pashent por comunica mas facil ‘no ta garantisa cu nan lo contesta di biaha’. Sinembargo ta trahando na e call center y DVG pa asina nan tin e posibilidad cu nan por contesta. Nan ta recomenda pa tuma contacto cu dokter di cas.
