Caso Apollo a culmina dia 24 di mei ultimo unda comunidad a conoce e resultado di un di e casonan di asesinato mas polemico di e isla, caminda e unico sospechoso cu tabatin a wordo declara liber y Ministerio Publico a sali dilanti pa pidi disculpa pa perde e rapport oficial di e caso aki y nan tambe a menciona cu a e investigacion no a bay manera mester ta.

Asesinato

Segun articulo 2:262 di Codigo Penal di Aruba ta señala cu un persona cu deliberadamente y premedita ta kita bida di otro persona, si ta culpabel di asesinato, ta wordo castiga cu bida largo den prison of ta haya un castigo temporal cu no ta surpasa 30 aña of ta haya un multa di cinco categoria.

Asesinato ta un di e delitonan mas grave den Codigo Penal di Aruba, mester cumpli cu tres elemento pa por condena un persona pa asesinato: e prome ta cu e sospechoso a kita e bida di un otro persona, e di dos elemento ta cu el a haciel’e di forma intencional y di tres mester tin pre-meditacion.

Hechonan

Den oranan di mainta di dia 23 di december di aña 2010 a haya e curpa sin bida di e periodista y presentador John A. Castro, miho conoci como “Poentje Castro” den su cura di cas, examen patologico a conclui cu el a fayece pa via di perdida di sanger como resultado di dos perforacion di bala na su curpa.

Varios testigo den bisindario a wordo scucha na aña 2010 como parti di e investigacion, nan a afirma cu nan a scucha zonido di tironan e anochi anterior 22 di december di 2010. For di punto di bista di ekipo di investigacion na e momento ey nan a conclui cu e victima a wordo asesina e anochi anterior cu balanan di arma di candela.

E investigacion den bisindario tambe a resulta den e recuperacion di e secuencianan di videonan graba e anochi di 22 di december pa camaranan di siguridad ubica na un compleho di apartamento, cercano na e cas di Castro. Despues e imagennan di e video a mustra esun cu tabata sospechoso ta di inicialnan (A.R).

Posicion di e fiscal

E fiscal su hipotesis tabata cu e imagennan di e camaranan ta mustra A.R saliendo for di su auto cu tabata para banda di e compleho di apartamentonan y a cana bay den direccion di cas di Castro. E fiscal ta supone cu A.R a warda te ora Castro a sali for di su cas pa bay para su auto den cura, manera Castro tabata haci’e como custumber. Ora cu Castro a cera e porta di e cura el a wordo asesina segun fiscal cu dos tiro di arma di candela. Despues di un rato A.R a core bay back na su auto y a bandona e sitio.

Segun e fiscal, e escenario aki ta wordo confirma pa e hecho cu A.R no por a duna un splicacion satisfactorio di su presencia na e luga, asina tambe e declaracion incriminatorio cu a wordo haci pa un testigo, ken a wordo scucha como co-acusado/testigo na aña 2021, contra ken e sospechoso na e momento ey, supuestamente a afirma cu a tira Castro. Tambe tin conversacionnan graba na 2021 den e bus cu ta transporta preso.

Ministerio Publico ta asumi e siguiente cronograma, Castro tabata na bida pa 10:34 pm di 22 di december di 2010, esaki a bin dilanti pa medio di un investigacion cu a wordo haci den su telefon cu a ser haya den su saco di carson unda a mustra cu el a manda un mensahe di texto na e momento ey, su delaster mensahe. Segun Ministerio Publico e no por a wordo asesina despues di 10.38 pm. Segun fiscal e imagennan di e videonan ta mustra cu A.R a para su auto 10:16 pm y ta sali for di dje 10:17 pm, ta cana den direccion nort y 10:39 pm a bin back coriendo, subi su auto y bandona e sitio. Segun fiscal, mester tene na cuenta cu e orario di sistema di camara (DVR) ta mustra imagennan graba cu ocho minuut di retraso pa loke ta trata e ora real.

Corte hunto cu abogado di A.R ta confirma cu e rapport oficial di dia 05 di januari di 2011 den cual ta describi e investigacion di e sistema di camara (DVR) ta afirma cu e orario di grabacion ta coresponde na e ora real. Sinembargo, den otro rapport di 23 di september di 2011 un miembro di ekipo di investigacion a scucha cu e orario di e sistema di camara ta ocho minuut atrasa cu e orario real.

E observacion cu e cual e ekipo di investigacion a basa su mes cu e sistema di camara ta ocho minuut atrasa no ta wordo indica den e rapport oficial, loke Ministerio Publico a basa su mes ta cu e sistema di camara tin ocho minuut di retraso ta cu un otro rapport oficial cu a wordo traha dia 12 di februari 2022, ta splica cu e informacion ta data di diesun aña despues di investigacion di e DVR en cuestion y cu ta basa unicamente di e memoria di e miembro di ekipo di investigacion.

Tambe a wordo estableci cu manera por a mira den imagennan graba, A.R a bay back na su auto ora Castro tabata bibo ainda. E escenario presenta pa e fiscal no ta cuadra cu e situacion, e conclusion ta cu e imagennan di sistema di camara mester wordo utilisa como prueba pero cu hopi cautela.

Asumiendo Ministerio Publico su hipotesis di espacio di cuatro minuut conta for di 10:34 pm den cual A.R por a realisa e tironan, e defensa tampoco por a haya un claridad riba e ora exacto den cual Castro a wordo mata, e examen patologico no tin ningun conclusion riba e punto aki. Testigonan den bisindario tampoco a duna un informacion di e momento precies cu nan a scucha e tironan.

Nan declaracionnan riba e punto aki ta varia y nan no ta descarta cu Castro a ricibi e dos disparo despues di 10:38pm, y si esaki ta e caso, e escenario presenta pa e fiscal di Ministerio Publico no ta wordo basa riba realidad.

Tin varios testigo cu a mira un of dos persona riba un brommer cu tabata bandona e escena di e crimen, antes of despues di scucha e tironan, esaki tampoco ta cuadra cu e escenario.

Teniendo na cuenta cu no ta existi ningun prueba forensico cu ta ubica A.R den escena di e crimen, Corte di Prome Instancia ta indica cu mester existi otro pruebanan mas fuerte pa señala cu A.R a comete e delito cu nan ta acusa di dje.

E hecho cu A.R a duna su declaracion pa su presencia den e bisindario unda e crimen a tuma luga no por wordo confirma pa testigonan (e tabata na e luga pa cumpra heroina) pero esey no ta nifica cu e declaracion por wordo califica como falso. Pa lo cual, no por wordo usa como un prueba legal.

Pa finalisa, Ministerio Publico a persigui A.R sin e pruebanan suficiente pa por confirma su culpabilidad, unico prueba concreto cu nan tabatin ta cu A.R tabata den bisindario e dia y ora cu Ministerio Publico ta sospecha cu Castro a wordo asesina, pero no tin ningun prueba forensico di e ora precies cu Castro a fayece.

E rapport di tur e testigonan ta contradeci e hipotesis di Ministerio Publico, loke tambe a hala atencion ta cu nan a acusa A.R di asesinato premedita pero nan no a presenta ningun prueba si e tabatin planea pa mata Castro, loke Ministerio Publico no a contesta ta con e rapport di un di e casonan mas grandi despues di Natalee Holloway a wordo perdi y a laga hopi mas pregunta cu contesta, solamente nan a pidi disculpa.