Situacion di Covid-19 na Aruba ta keda sumamente preocupante, unda ainda ta mira un aumento fuerte ainda di e cantidad di caso nobo entre 1 y 8 di september (485), y un aumento ainda di e total di caso activo, aunke mester bisa cu e aumento ta hopi mas chikito cu loke tabata e caso den e simannan anterior.
E aumento di caso activo nobo, comparando dia 1 y dia 8 di september ta mustra riba un aumento di 44 caso, e incremento mas modera di henter e periodo. Ta di spera cu den e proximo simannan por yega na un reduccion di e cifranan aki. Na e momento aki ainda e cantidad di caso activo ta un porcentahe halto (49,4%) di e total di caso positivo. E cantidad di caso di recuperacion a aumenta compara cu e siman anterior (292 vs 336)
Di otro banda, por observa cu e situacion na Hospital ta birando mas dificil, cu un aumento basta fuerte di e casonan cu mester hospital sea pa cuido regular como pa ICU. Desde – di september Hospital ta duna e ocupacion pa e dos facilidadnan a base diario desde dia 28 di augustus. Entre e fecha ey e cifranan pa hospitalisacion den ICU y ‘Ward’ (e piso pa e pacientnan menos grave) tabata varia entre 7-11 pa ICU y 19 y 29 pa e Ward. E cifranan mas halto ta di ayera (11 den ICU, 29 den Ward), mustrando un tendencia di aumenta, aunke tin subida y bahada den e cifranan di un dia pa otro. Ayera tabatin en total 40 persona interna na Hospital, mientras dia 28 di augustus tabatin 32 persona na Hospital pa Covid-19. A base di esaki tambe a bin e anuncio di Hospital di limita otro servicionan pa crea mas espacio y capacidad di personal pa maneha caso di Covid-19.
