Tur aña riba dia 4 di mei ta tuma luga un conmemoracion di segunda guera mundial na plaza defensornan di Aruba, esaki ta pa asina recorda cu Aruba tambe a forma parti di e fecha historico aki.

Aruba ta un isla chikito cu a hunga un rol grandi den e segunda guera mundial, pero lastimamente tin un grupo chikito cu ta na altura di esaki. “Cu presencia di poco pero cu un sentimento grandi yen di orguyo”, un persona den publico a bisa. Pa publico esaki tabata algo nobo cu nan a wak, pa esunnan hoben y chikitinnan ta prome biaha cu nan ta wak algo asina.

“Ta tristo pa wak cu propaganda pa un conmemoracion asina aki a wordo haci y nos hende local no sa nada of no tin interes pa asisti na esaki, pa motibo cu nan ta wak esaki manera algo di historia sin tene cuenta cu nos ta haci esaki tambe pa duna balor y respet na e famianan di e veteranonan cu a forma parti di e segunda guera mundial. Nos a nota cu tabata tin presencia di cuater veterano”, Coby Henriquez di Camarada Aruba ta splica.

Un meneer den publico a splica cu “Nos hendenan local no por saca tempo pa asisti na un ceremonia asina bunita, pa motibo cu semper tin un excuus cu no tin tempo pero pa otro actividad manera carnaval ningun hende ta keha”. ‘Falta di historia, nos kier wak mas hende local y no solamente presencia di minister, gobierno y e militarnan. Mester promove e evento aki’, un hoben a remarca.

‘Aunke cu nos no tabata den e teritorio di guera, Aruba a hunga un rol hopi importante por ehempel, nos tabata provee pa nos aliadonan azeta di refineria. Aruba tambe tabata e unico isla afo di Europa cu tabata blanco di atake pa motibo di refineria, Dios gracia e torpedo a pega na nos rif y no a yega pa haci un daño grandi na nos isla.

Tambe a recorda nos veterano como Boy Ecury, Capitan Verhoeks entre otro, cu a forma parti di e segunda guera mundial aki. “E ta duna nos cu ta forma parti di Reino cu claramente nos ta solidario nan ta tur esunnan cu a perde nan bida cu a mira a tragedia cu nos conoce y cu ban spera cu nunca mas esaki ripiti. Ban spera cu nos presencia y un tiki mas di propaganda pa e trece consciencia aki den pueblo di Aruba”, minister Xiomara Ruiz-Maduro a bisa.

E programa a consisti di un oracion di e religioso militar, ponemento di krans pa gobernador, un discurso di minister-president, ponemento di krans na nomber di familiarnan di e fayecidonan y ex veteranonan, na nomber di parlamento, gobierno, representacion di Hulanda na Aruba, personal y militarnan di Marinierskazerne y e hubentud di Aruba. Esaki ta fecha cu mester wordo recorda pa asina historia no bolbe ripiti.