Lider di fraccion di MEP, Rocco Tjon a declara cu nan kier wak diferente contract of documento controversial cu minister Marisol Lopez-Tromp a referi na dje durante e reunion den Parlamento, diabierna ultimo.

Nan ta contract entre otro cu e mandatario Lopez-Tromp a bisa cu el a haya for di minister Bikker cu a dun’e pa firm’e. Tambe e contract pa construi un Warda di Polis na Wayaca. E contract pa construi mas capacidad di detencion. Tambe nan kier wak e consehonan di e departamentonan cu a bisa cu e contractnan aki ta contra ley.

“Tambe den mesun momento nos kier wak e conseho di Sr. Bikker,” el a bisa. Parlamentario Tjon ta supone cu ora minister Bikker a duna su colega Lopez-Tromp e contractnan pa e firm’e, e mester tin consehonan pa substancia nan.

Otro caso tin di haci cu e denuncia haci cu iregularidad cu e casnan na Seroe Colorado, unda den e bisindario aki ta wordo lanta un proyecto hotelero di cinco strea cu a keda aproba tempo di ex-minister Otmar Oduber. P’esey fraccion di MEP kier bin cu un reunion publico riba e topico di corupcion.

Ademas el a laga sa cu e reunion aki ta apart di e segunda ronda cu a keda pendiente di e reunion cu a keda posponi diabierna ultimo. Ya cu e reunion aki tabata pa e mandatario defende su mes riba e cuater puntonan cu e parlamentarionan di POR a trece dilanti pa retira e confiansa den su persona. Sr. Tjon a bisa cu pa fraccion MEP ta importante pa sigui cu e segunda tanda di e reunion aki, unabes cu Sra. Lopez-Tromp ta bek na Aruba.

Parlamentario Tjon a bisa cu durante e reunion publico yama pa fraccion di POR y sosteni pa fraccion di MEP y RED, tabata pa atende un mocion di desconfiansa contra Lopez-Tromp. Pero a bin resulta cu e mandatario en cuestion mas bien a trece hopi informacion cu tin di haci cu iregularidad cu el a encontra entre otro na DIP, DOW y Serlimar. P’esey nan kier bin cu un reunion publico specificamente dedica na e asuntonan aki.

Nan kier busca mas claridad riba e informacion aki cu, segun parlamentario Tjon, niun di nan tabatin conocemento di nan. Como parlamentario hopi biaha nan no ta haya – segun Sr. Tjon – tur informacion necesario y tampoco tur documento. “Solamente si bo sa di algo, bo por haci e pregunta aki,” el a bisa. E parlamentario ta lamenta cu prome di e reunion di diabierna ultimo, minister Lopez-Tromp nunca a informa Parlamento di tur e casonan cu el a encontra den su ministerio.

Encuanto si e mandatario no a laga e documentonan aki atras pa Parlamento por tin acceso na dje, Sr. Tjon a declara na Bon Dia Aruba cu nan a haya algun documento ‘ter inzage’. E documento aki tin di haber cu un contract, pero sin conseho tras di dje pa asina wak si e contract berdaderamente no ta cuadra, y cu e ta contra ley. Tambe el a laga algun investigacion disciplinario cu algun ambtenaar a haya.

Un punto cu a keda den evidencia ta cu parlamento como organo di control no ta haya e documentonan importante pa haci nan trabao. Sr. Tjon a reitera loke mesun Sra. Lopez-Tromp a treci dilati. Esta cu como parlamentario bo no ta dispone di informacion. Sino cu unabes cu bo ta minister bo por dispone di tur documento y informacion. Sr. Tjon a expresa cu como parlamentario, si bo no sa di actonan di corupcion, bo no tin e documentonan.

Encuanto cu minister Lopez-Tromp a yega di declara cu e tabata dispuesto pa bay un segundo tanda di e reunion pa sigui duna mas informacion na Parlamento y te hasta pa bay un votacion final riba un mocion di desconfiansa, mientras cu e reunion a wordo posponi. Riba e punto aki, parlamentario Tjon a referi cu presidente di parlamento Ady Thijsen a duna un splicacion tocante e asunto aki. Ta asina cu fraccion di POR a solicita e reunion di diabierna ultimo, y nan mes a solicita pa e keda posponi. Pa asina sondea e posibilidad si Sra. Lopez-Tromp ta dispuesto pa bay bek na mesa cu prome minister, y evalua si por sali di impasse aki. E mesun mandatario Lopez-Tromp a declara na presidente di Parlamento cu e ta dispuesto pa atende e mediacion aki.