Pobreza di varios tipo… Pa nos combati…

Nos ta topa e siman aki cu varios tema cu di un o otro manera ta relaciona. Un di nan ta e reunion di parlamento tocante inflacion y pobreza na Aruba. E pregunta no ta si tin pobreza of no. Tin pobreza, pero e opinionnan ta varia encuanto e magnitud di e fenomeno. E debate a decepciona di dos manera. Uno ta cu no a trece e situacion real dilanti na un manera coherente. E otro ta cu nos no a tende solucion factible bin di ningun banda. Pa cuminza, pakico e situacion real no a bin dilanti? Nos tur sa cu e crisis di Covid a haci hopi daño, principalmente entre e capanan di sociedad di menos recurso. Ta di supone cu solamente un parti di e gruponan aki a logra restablece na situacion cu nan tabatin antes. Ademas, tabatin un grupo cu tabata hiba un bida dificil caba. E fenomeno di banco di alimento no ta algo cu a surgi na 2020 cu e crisis di salud. No ta pornada cu nos tin semper caba un grupo di hende cu ta haya bijstand, cu no tin un entrada di nan mes.

Fuera di esey nos tin un grupo grandi di stranhero den situacion di emergencia, principalmente fruto di e situacion di crisis na Venezuela. Tin varios fuente di atencion y ayudo pa e grupo aki, sin embargo ta dificil pa haya un bon vista di e situacion general di e grupo aki. Esaki en principio ta un tarea di gobierno, unda falta bastante informacion. Segun cu tempo ta pasa ta bira mas urgente pa haya sa kico ta e proposito cu e hendenan aki, pasobra por lo pronto no ta mira un situacion faborable na e pais di origen. Un parti – desconoci – di e grupo aki ta biba den pobreza. E parti local di hende den pobreza tambe ta duna un panorama complica pasobra no tin un vista cla riba e composicion di e hogarnan, pa por determina den cual di nan tin pobreza of no. Pa clarifica: e hecho cu un persona tin un salario minimo, cu no ta yega na e ‘bestaansminimum’, no ta indica sin mas un situacion di pobreza, esey ta depende di e demas entradanan cu por tin den e hogar. Segun cifra di CBS (Censo 2020), e grupo cu ta biba nan so ta mas o menos 8,5% di e poblacion total. No por conclui sin mas cu tur e hogarnan di un persona ta bibando den pobreza. Nos mester di informacion hopi mas detaya pa por determina cuanto hogar ta den situacion di pobreza. Fuera di esey, ta keda e punto di kico ta haci structuralmente pa alivia pobreza. For di fuente fidedigno nos ta tende cu recientemente a tuma lugar un ‘clean up’ entre e personanan cu ta haya bijstand pasobra a constata cu nan tabata traha banda di e ayudo di emergencia aki. Esey ta logico, pero nos no ta mira ni tende di un politica mas general.

Nos tin tambe e aspecto di inflacion, cu desde aña pasa a aumenta sustancialmente a base di e situacion internacional. Esaki tabatin efecto riba tur hogar, sigur tambe riba esunnan cu tabata den problema caba. Fuera di esey, por constata cu, a pesar cu empleo formal – cantidad di empelo manera registra pa SVb – a bolbe recientemente na e nivel pre-Covid, na 2022 a cobra mas di 40 miyon florin menos na loonbelasting compara cu 2019, alrededor di 15% menos. Esey ta implica cu esnan den empleo formal a cobra aña pasa sustancialmente menos cu na aña 2019, cu por representa un perdida di poder di compra colectivo di algun cien miyon florin. E tema di efecto di inflacion riba pobreza merece un mihor debate cu loke tabatin ayera den parlamento.

Otro tema importante ta loke ta señala den un articulo den nos edicion di ayera, tocante e decisionnan clave cu mester tuma proximamente den enseñanza pa loke ta idioma di instruccion. Cada escogencia posible ta bin cu problema grandi, en general pa motibo di e consecuencianan practico. Por ehemplo, si scoge pa mantene Hulandes como idioma di instruccion, nos ta sinta cu varios generacion di maestro y docente cu ta custumbra henter nan carera caba di dicidi pa nan mes cuanto Hulandes y cuanto Papiamento nan ta aplica den nan klas. Ademas, otro pregunta cu ta resulta tambe di e investigacion actual di Inspeccion Hulandes y Arubano, ta si e instituto pedagogico ta equipa pa duna e calidad cu e proyecto di mehoracion ta requeri. Te na e momento aki, loke nos ta haya di tende ta cu e nivel di maestro cu IPA ta entrega ta ‘substandard’, tanto pa loke ta Hulandes como Papiamento. Con ta bay re-educa henter e cuerpo docente di Aruba pa pone nan na e nivel necesario? Esaki no ta parce nos un tarea di un par di luna, sino di varios aña… Y esaki ta yama otro pregunta, si e cuerpo di docente den gran mayoria lo apoya e cambionan necesario, irespecto e modelo cu lo scoge. Nos tin nos duda den esey. Y pakico esaki ta asina importante? Pasobra e pasonan pa tuma ta decisivo pa con nos ta bay combati e ‘pobreza’ intelectual enorme cu ta producto di un sistema educativo mancaron pa varios decada, cu porfin por bay haya un mehoracion, si no solamente tuma e decision tocante idioma di instruccion, sino pone e recursonan disponible pa un plan a largo plazo, y ehecuta esaki, sin cu un siguiente gobierno bin daña e asunto atrobe.