(BBC) – Mas cu mita di Argentinonan ta pober. Esaki ta refleha den e datonan economico oficial cu a sali diahuebs ultimo door di Instituto Nacional di Estadistica y Censo (Indec). E estudio ta mustra cu pobresa a alcansa 52.9% den e prome mita di 2024, loke ta representa un aumento di 11 punto compara cu e di dos mita di 2023 y desde cu Javier Milei a asumi poder na december ultimo.

Di e manera aki, e cantidad di hende pober den e pais sur Americano ta alrededor di 24 miyon. Aunke expertonan a spera cifranan economico desalentador, e resultadonan ta sigui sorprende ya cu e tasa di pobresa ta esun mas halto den e ultimo 20 aña (na 2004 el a yega 56.8%).

Di acuerdo cu datonan di Indec, indigencia tambe a aumenta, alcansando 18.1%, loke ta representa un salto di 6.2 punto compara cu e di dos mita di 2023.

E situacion ta specialmente problematico den infancia: e datonan ta mustra cu dos tercera parti (66.1%) di muchanan bou di 14 aña ta forma parti di casnan bou di e liña di pobresa. Mientras cu e porcentahe total di hende pober pa e gruponan 15 pa 29 aña y 30 pa 64 aña ta 60.7% y 48.6%, respectivamente. Den e poblacion di 65 aña bay ariba, e cifra ta yega 29.7%.

E datonan ta bin despues cu Milei a dicidi di implementa algun cambio radical den e economia di e pais – cu e inflacion mas halto na mundo, cerca di 270% anualmente –, manera e ahuste sin precedente di gasto publico.

E mandatario kier yega na balansa fiscal y e asina yama “cero deficit”, pa garantisa cu Estado tin mas entrada cu gasto.

Esaki, ta algu cu den palabranan di Milei “no ta ser negocia di ningun manera” pa motibo cu e ta considera e unico manera pa baha prijs, e problema mas urgente pa e Argentinonan.

Pero e medidanan a resulta un sla duro pa esnan cu no por ni haya acceso na e macuto di cuminda basico.

Mirando e cifranan nobo di pobresa, gobierno a culpa su predecesor, e peronista Alberto Fernandez, y e maneho di e 12 aña anterior di Kirchnerismo na poder.

Den un conferencia di prensa teni prome cu e publicacion di e datonan economico, e vocero presidencial Manuel Adorni a sigura cu nan a ricibi “un herencia desastroso, un di e pio den historia di Argentina,” un producto di e politicanan “populista” cu a ser aplica na Argentina den e ultimo dos decada.

Sinembargo, oposicion a culpa gobierno di Milei y su “politicanan di ahuste.”

“Den 6 luna, e ‘ahuste mas grandi den historia’ a empobrece mas di 5.3 miyon Argentino y a hiba mas di 3 miyon na indingencia,” asina Eduardo “Wado” de Pedro, senador di Union por la Patria, a bisa a traves di su cuenta riba X.