Diaranson anochi 7 di september 2017 mi a prepara mi mes debidamente cu un refresco y un baki di popcorn, pa mi por a wordo informa via TeleAruba encuanto “e berdad”. Den anuncionnan haci previamente, e partido POR a declara cu Otmar Oduber lo a bay basha abou riba e gobierno di Mike Eman y bisa pakico ela bandona e fila di e partido berde.
E entrevista a dura mei ora y mi a compronde cu esaki tabata part one y cu diadomingo awor lo sigui part two. Wel mi no a logra ni di mishi cu e popcorn ni tampoco dal un slok di e refresco, pasobra suchando Otmarcito, lagrimanan di emocion y duele tabata brota for di mi wowo. Mi a casi gasta un paki di papel pa seca mi wowonan. Con por ta posibel cu Mike Eman y e otro ministernan por a hinca den nan cabes pa maltrata Otmarcito di e forma cu a sosode. Otmarcito nunca a kibra un copi y a sigui e ehempel di su lider Mike Eman cabalmente cu su comportacion di “de braafste jongetje in de klas” y hunga victima. Cu esaki ela converti su mes di e Tal Otmar pa San Otmar.
Pakico tanto maltrato anto? Wel e no por divulga exactamente e 9 puntonan, pasobra esey ela papia cu gobernador den confiansa y e no kier falt’e respet. Straño ta sinembargo cu si ela falta gobernador respet ora cu ela acudi cerca su lider durante e welga di hamber.
Loke a resalta den su prome “berdad” ta cu Otmarcito el Santito ta duna di conoce cu for di fin di 2015 caba e tabata tin den su poder documentonan na unda e por a deduci cu tabata sosode cosnan robes. Wel si Otmarcito el Santito kier ta transparente manera e ta declara cu un gobernacion nobo lo mester cumpli cu ne, pakico e no ta mustra pueblo e documentonan aki of mihor ainda pakico e no ta entrega nan na Ministerio Publico. Ela bay gobernador na comienso di 2016 y despues a logra un truega (wapenstilstand) den ministerraad pa locual ela keda forma parti di gobierno. Otmarcito el Santito sinembargo den e mesun januari 2016 a declara enfaticamente y publicamente cu “AWE MI TA MAS AVP CU NUNCA Y MI TA ORGUYOSO DI AVP PA MAS DI 20 AÑA”. Kiermeen cu Otmarcito el Santito ta orguyoso cu cosnan ta bai robes?
Otro punto cu a hala mi atencion ta e denuncia cu tin alrededor di 10 mil ilegal riba nos Isla di locual 8 mil ta traha ilegal. Nos ta corda ainda e caso di RIU na unda localnan a wordo retira y a tuma personnan di exterior pa tuma nan trabou over. Kico Otmarcito el Santito a hasi pa defende e trahadornan local e tempo ey? NADITA DE NADA.
E hipocresia di e partido POR ta keda bisto ora cu Otmarcito el Santito ta denuncia e 10 mil ilegalnan, mientras su compañero di partido Jairo Maduro, durante e debate di Latino ta declara cu e Swiss model ta discrimina e Latino. Kico e ta anto ora ta cumbini critica gobierno cu su open-door policy pa gana voto of bin cu medida pa frena entrada di mas ilegal. Kiko POR ta bai hasi al respecto anto, laga e ilegalnan keda traha ilegal of ta percura pa nan bandona nos isla?
Wel na final mi a drumi malisimo despues di e desplege di un actuacion cu lo a merece un Oscar, pasobra mi mester e convivi e pena cu Otmarcito el Santito mester a pasa aden. Pobrecito Otmarcito, el Santito.
