Prome Minister Hulandes, Mark Rutte ayera a bisa cu no mester tolera e menasanan cu a forsa un maestro na Rotterdam pa sconde, despues cu algun studiante a expresa contra un caricatura politico den su klas.

Rutte a papia algun ora despues cu polis di Rotterdam a bisa cu nan a aresta un muhe di 18 aña di edad bao sospecha cu el a post un mensahe riba rednan social cu tabata ‘incita otronan pa comete crimen’ dirigi na e maestro y e scol.

“E hecho cu na e momento aki ta menasando maestronan pasobra nan a pone atencion den nan les riba e discusion rond di caricatura ta absurdo y nos no mester tolera esaki”, Rutte a bisa.

Legisladornan Hulandes a reacciona cu rabia na reportenan cu e maestro, kende no a ser identifica publicamente, a ricibi menasa relaciona cu un caricatura cu supuestamente tabata mustra na e klas durante cinco aña, na Emmauscollege Rotterdam.

Dia 3 di november polis a tweet cu e maestro a ricibi menasa y cu nan tabata tratando e caso ‘extremadamente na serio’. Polis no a elabora riba e naturalesa di e menasanan.

E menasa a yega algun siman despues cu maestro Frances, Samuel Paty a ser decapita pafo di su scol na Paris dia 16 di october na man di un refugiado adolescente di origen Chechenio pa mustra e caricatura den un les di educacion civico.

Den un declaracion riba su website ayera, e scol na Rotterdam a bisa cu ta ‘completamente inaceptabel cu un discusion entre maestro y alumnonan ta tuma over pa hende externo kende ta usa esaki pa haci menasa sin base’.

E caricatura, titula ‘Inmortal’, a ser traha despues di e atake mortal na 2015 contra oficinanan di e corant semanal satirico Frances. E caricaturista, Joep Bertrams, a bisa Trouw e siman aki cu e caricatura no ta mustra e profeta di Islam, Mohammed. E dibuho a gana un premio Hulandes como e miho caricatura politico na 2015.

Polis y autoridadnan no a detaya e circunstancianan exacto di e caso y pakico esaki a escala. Minister di Educacion, Arie Slob a bisa NOS anteriormente e siman aki cu tabatin un discusion tocante e caricatura ‘cu a tuma su propio dinamica pa motibo di cosnan cu a bay riba rednan social’.

E scol a bisa cu mesun importante cu aumenta e conocemento di studiantenan, ta ‘nos tarea pa guia nan na un luga den sociedad unda nan por haya nan caminda den libertad y cu respect pa otro. Maestronan ta discuti esaki cu alumnonan tur dia’.

Rutte, kende ta duna les part-time na un scol na Den Haag, a bisa: “Mi kier enfatisa aki con esencial e ta pa nos tur por ta capaz di discuti un topico manera libertad di expresion den nos lesnan sin presion externo. Pasobra, si, e por ta complica na momento cu un persona tin un opinion cu ta contra bo vision of bo creencianan religioso.” Pero, el a agrega, “e otro persona por bisa esey libremente. Niun hende tin derecho di no wordo insulta.”