PM Evelyn Wever Croes kier un areglo cu Hulanda, Pero ambtenaarnan cu no conoce sistema financiero di Aruba tin exigencia inaceptabel

Aruba mester a pusha pagonan pendiente (particularmente na comerciantenan local) pa despues, pa asina por a cubri e salarionan, FASE y subsidio di salario na luna di juli y augustus. Prome Minister Evelyn Wever Croes a contesta Bon Dia Aruba un serie di pregunta cu a manda despues cu a anuncia cu ta trahando riba un areglo di prestamo pa cubri gasto di dos luna.

Manece ta conoci, esaki tabata den luz di e hecho cu Hulanda a laga sa cu e 204 miyon florin cu tabata pa e di tres tranche, ta unicamente unabes cu acepta e condicionnan pa e dos consensus rijkswet, pa e supervision financiero y pa e entidad di reforma. Esaki a crea un necesidad di 136 miyon florin. Na juli, ora cu Prome Minister no a bay di acuerdo cu e proposicion di Hulanda, el a informa Bon Dia Aruba cu ta bay usa reservanan cu idealmente mester keda warda, mirando cu e di dos parti di e crisis di Covid tabata na caminda.

Hulanda no a conta riba prestamo

Sinembargo, el a recorda tambe cu locual el a splica den Parlamento y tambe durante e cumbrenan cu comercio, cu ta bay hala e pagonan specialmente na comercio local pa asina cubri e necesidadnan financiero di Aruba. “Awor nos mester bay paga nan.”

Prome Minister Wever Croes a enfatisa cu e prestamo cu ta trahando riba dje ta bay localmente. “Secretario di Estado, Raymond Knops tambe a core yama mi diabierna pa puntra ta con nos a logra esaki y mi a splik’e cu nos ta un gobierno serio cu ta traha duro y tin hopi comerciante cu ta wak esey y kier yuda Aruba.” Sinembargo, Prome Minister a bisa cu den caso cu mester a bay internacionalmente y lo tabatin mester di aprobacion di Conseho di Minister di Reino, “lo mi kier wak ken di nan lo nenga nos esaki. Ta nan a forsa nos bay presta. Awor cu nos ta hayando prestamo, nan no por keda sin aproba.”

Credit Suisse y companianan estatal

Hopi hende a specula riba cu Credit Suisse lo a percura pa e prestamo. Pero esun di Credit Suisse tabata un prestamo cu a cuminza negocia prome cu e crisis di Covid a dal. “Porfin el a keda cla toch. Pues Credit Suisse no tin nada di haci cu e situacion actual. Mi a splica esey hopi cla.” Manera el a bisa den su discurso, “awor nos ta formalisando un que otro. Ora nos ta cla, nos ta publica manera semper nos a haci. E prestamo aki ta bin di e mesun institutonan y bou mesun condicionnan di semper.”

Prome Minister Evelyn Wever Croes ta sigura cu no ta bay cana e caminda di usa companianan di utilidad como garantia pa haya fondo. “Nos no a mishi e companianan estatal mes y no tin pensa di haci’e tampoco.”

Kier yega na areglo cu Hulanda.

Prome Minister Evelyn Wever Croes: “Nos echt kier a yega na un bon deal cu Hulanda pasobra 0% ta hopi faborabel. Pero nan condicionnan di e supervision financiero no ta algo cu nos por traha cune y lo kibra nos pais. Ta algun ambtenaar a traha nan, cu no sa mes cu nos sistema financiero ta full diferente cu di Corsou.”

Riba dje Aruba a cumpli cu tur e condicionnan cu Hulanda a pone riba mesa. “Ta aplicando e Wever-Croes norm pa tur e vacaturanan nobo desde mei e aña aki.” Den un entrevista cu otro medio di comunicacion, Prome Minister a ilustra cu dificilmente por bay corta den contratonan cu ta coriendo caba y ta un proceso cu mester bay negocia. E probabilidad cu ta bay reta Gobierno den Corte lo ta grandi. “Pero e ley pa regla e condicion aki mester pasa Parlamento prome cu prome di october. Dus, si, nos ta cumpliendo. Es mas, nos ta e unico pais cu ta cumpliendo cu tur condicion.”

Situacion comparabel cu Grecia

Manera ta conoci, despues di e crisis financiero/bancario di 2008/2009, un di e paisnan cu a cay den crisis tabata Grecia. Union Europeo a yuda, y Alemania en particular a convence otro paisnan pa interveni. Sinembargo, e ayudo a bin a cambio di reformanan pisa pa cambia henter e structura publico di Grecia. Pero e situacion aki no ta comparabel cu Aruba, segun Prome Minister. “Prome cu Covid, nos a bolter un deficit di 400 miyon den un surplus di 14 miyon den cinco aña. Con? Cu reforma y gobernacion responsabel desde 2017. E diferencia ta cu no ta otronan mester a bin hacie pa nos, pero nos mes a hacie. P’esey mi ta convenci cu nos mes por.”

Mas ainda e circunstancianan actual ta diferente cu e tempo di crisis di Grecia. “Awor tin Covid. Pues si kier compara lo mester compara e ‘schenking’ (donacion) cu Hulanda a duna Italia y Spaña versus e ‘prestamo’ cu nan kier duna nos, berdad na 0%, e ta keda un prestamo,” ta e comentario di Prome Minister Wever Croes na Bon Dia Aruba.