Diadomingo a tene e di dos edicion di ‘Curvy Celebration Expo’, unda cu variedad di panel di paña, estetica, salon di beyesa, detox, te cu servicio medico tabata tin presente.
Bon Dia Aruba a papia cu un di organisadonan, Kylie Hernandez Croes: “Aña pasa el a cuminsa oficialmente, pero e tabata algo mas chikito. E aña aki nos a dicidi di haci evento grandi. Y otro aña sigur nos kier haci esaki mas grandi. Un evento dedica specialmente na tur plus size ladies.”
Segun sra. Hernandez Croes ‘e ta un women empowerment event’. “Nos kier a trece algo diferente pa Aruba y un concepto cu nunca no a wordo mira. Tin diferente curpa di plus size y awendia plus size ta un fashion cu ta bezig ta stand out. Esaki ta basicamente locual nos ta presentando awe.”
Un di e panel cu tabata tin den e exposicion tabata Laboratorio di Servicio, hunto cu Botica di Servicio acompaña cu Aruba Medical Services. “Nos tabata interesa den e evento aki y dispuesto pa yuda loke tasalud pa nos hende muhenan akinan na Aruba”, Maribel Tromp di Botica di Servicio a remarca.
“Esaki ta nos prome biaha na e evento asina aki, e ta algo nobo, pero bayendo bon. No ta importa ki size e persona ta, nos ta ofrece un check up pa sucu y presion. E persona ta haya e resultadonan di biaha. E test di colesterol nos ta manda via e-mail of whatsapp, paso nos ta mand’e laboratorio prome.”
Fundacion Centro famia di criansa Arubano tambe tabata presente den exposicion. Nan fundacion ta pa yuda muchanan cu no por keda den nan propio cas, pa motibo di negligencia, abuso y maltrato.
“Pa e muchanan akinan no tin nada mas miho cu un famia di criansa. Nan por keda den internaat, pero esey ta bon pa un temporada cortico. Pa e muchanan, mester di famia cu kier duna nan atencion, cariño y amor cu nan tin mester te ora e situacion drecha”, Nathalie Tromp, trahado na e fundacion, a aclara.
E fundacion ta bisa cu nan ta gradicido pa e oportunidad cu e organisadonan a duna nan, pa ‘asina por parti mas informacion di nan fundacion’. E motibo ta cu tin hopi informacion cu ta negativo y esey ta pone cu famia no ta acerca nos como fundacion. “Nos ta aki pa duna informacion corecto, realistico manera cu e ta.”
Di parti estetica Bon Dia Aruba a acerca Lotus Spa y nan splica cu nan ta un estetica integral. “Nos ta ofrece tratamento pa curpa y facial pa nos hendenan, pa asina haci e curpa mas bunita. Nos tin diferente tratamento pa acne y tambe pa haci reduccion di celulitis”, Angie Garcia a splica.
“Tin hopi cos cu ta encera beyesa. Nos ta haci tur e tipo di tratamento pa e cuido nan aki. Nos ta haya esaki ta un bon evento paso e ta motiva nos hendenan local pa conoce nos productonan pa nan cuido.”
