Pleito innecesario cu CAft… Ki dia ta bay siña…?

Gobierno di Aruba, mas specificamente nos minister encarga cu finanzas, ta den un problema serio, y na nos parecer totalmente innecesario, cu e colegio di supervision financiero CAft. Mas tempran e siman aki nos por a tuma nota caba di e iritacion di banda di e minister, cu a declara den rueda di prensa cu e no ta aprecia cu e conseho di tres persona ta mete, segun e minister, den asunto cu ta regarda solamente e gobierno mes.

E reaccion di e entidad supervisor no a tarda pa bin, den forma di un carta cu ta pone ‘de puntjes op de i’ pa loke ta e manera cu e comunicacion entre e minister y e organismo mes mester bay. Den e asunto aki, tambe, rabia ta mal consehero. Midi palabra bon midi, y tene e conversacionnan menos agradable interno, esey ta e miho manera pa maneha e tipo di asunto aki. Pero, di otro banda, e ta keda trabao di hende, y ey cos sa bay robes.

Sin embargo, ora nos ta purba mira e asunto aki cu cabes friu, sin emocion innecesario y inadecua, ta bira inevitable pa analisa ta ken no ta hungando su papel manera mester ta. Y den esey lamentablemente ta e minister di Aruba ta esun cu tin di perde. Y pakico? Pasobra ta trata pa un gran parti di documentacion cu e colegio supervisor ta pidi pa nan por haci nan trabao. Esey ta naturalmente suheto na kico un persona ta haya cu ta necesario pa nan haci nan trabao. Si den un cierto caso tin un diferencia di opinion, ta absolutamente necesario pa hiba e discusion ey den un camber cera, y sali afo cu un decision y un solo palabra. Pa nos como medio di comunicacion e ta interesante pa tuma nota di diferencia di opinion, pero no tocante cos cu por keda resolvi papiando cu otro na un manera franco, pero semper cordial y cu e meta pa resolve problema pa nos, Aruba.

E impresion cu e minister di Aruba a duna den su rueda di prensa ya caba tabata bay demasiado den direccion di “y ta kico nan ta kere; bin mete den nos asuntonan interno.” Aunke ta berdad cu e actual gobierno tabatin arte ni parte den e causa directo di e actual supervision Hulandes, ta un realidad grandi cu como gobierno sucesor bo ta obliga pa atende e asuntonan aki, pa nos… Un minister no tin di mira esaki como un asunto personal, sino cu e ta representa nos. Y nos mester kier mira un persona cabes friu cu ta atende e asuntonan aki cu inteligencia, cordialidad, y diligencia.

Y ta net den e ultimo aki cos a bay robes, y por lo tanto mester atende e kehonan, por lo visto hustifica, di e colegio tocante e documentonan cu ainda nan no a haya, y otronan cu a haya caba, pero tambe cu un retraso inhustificable. Con un minister ta bay conta CAft cu ainda tal o cual entidad no a entrega nan presupuesto? Kico? Fin di aña ta yega anto e presupuesto no t’ey? Ta pakico ta tolera e tipo di actuacion aki di cual director? Nos ta pagando salario halto na hende inepto cu no por percura pa un presupuesto na tempo? Nos ta supone cu tur e entidadnan aki tin nan schedule interno pa prepara presupuesto prome cu aña caba, y durante e aña siguiente percura tambe pa un cuenta anual disponible na tempo. Ora bo mester bay conta e colegio cu bo no tin ningun control riba e entidadnan, y ta ora y dia nan kier nan ta entrega, bo a corta bo cara caba, y pakico? E mesun iritacion cu e minister a mustra cu CAft, el a mustra esey na e entidadnan cu tabata laat cu entrega nan documentonan?

Esey no ta tur. Ta bin e asunto di stipula cual ta e entidadnan cu pa e periodo nobo ta considera como perteneciente na e ‘sector colectivo.’ Ken ta fayando aki? CBS no por a cumpli cu e tarea describi claramente den e ley corespondiente (LAft)? Of tin algun otro motibo pa esaki? Y si ta CBS tin culpa, ta ken mester actua? No ta e mesun minister aki ta responsable pa e departamento di estadistica aki? E no mester ni atende e asunto cu un colega ministro…

Finalmente, e asunto cu a causa mas iritacion cerca e minister. E fondo pa e Plan di Crisis Social ta aparece riba presupuesto y ta suheto na escrutinio y comentario di e colegio di supervision. Asina leu cu nos conocemento ta bay, a puntra pa indica con ta garantisa uso apropia di recurso di e fondo y con e mecanismo ta pa saca y deposita den e fondo. Nada di otro mundo, na nos parecer. No suficiente pa henter e berinche cu ta arma actualmente. Y mucho menos pasobra esey no ta yuda agilisa nada. Mester corda tambe, bayendo na e raiz di e asunto, pakico nos tin un ley y un CAft. Maneho pesimo di nos finanzas a hiba nos na unda nos ta, nada otro. E ley no ta e substituto di un Algemene Maatregel van Rijksbestuur?