Despues cu recientemente minister encarga cu enseñansa a anuncia su salida for di politica, hopi lo a spera cu den e lunanan cu a keda e lo a bay trata na haci mas tanto posibel cos positivo ainda, pa Aruba. Aparentemente e tin otro pensamento riba esaki. Sin duda algun e por tin rason den cierto critica cu e tin riba e fundacion SMOA, cu ta dirigi nos scol grandi di HAVO/VWO. Sigur ora e ta vocifera e opinion cu e no ta mira pakico mester bin un director di exterior pa dirigi e scol aki, e por haya bastante apoyo di hende, cu tambe ta kere cu mester ta posibel pa haya candidatonan local, capacita pa yena e vakantie aki. Al fin y al cabo, e personanan cu a bin for di Hulanda, carga te dobla lomba cu experiencia y edad, no a resulta y a duna e mal impresion cu nan tabata pensa di bin aki pa cobra bon pa un cierto periodo, prome nan bay descansa di berdad. Nos ta bisa explicitamente ‘impresion’ pasobra no necesariamente ta nan actitud tabata e problema mayor. E ambiente cu nan mester opera aden, no ta asina adecua, ‘to say the least.’ E problemanan ta parce di tin reis profundo cu no ta depende ni di actitud ni di accion di un persona so.
Pero no por keda pensa y pleita solamente, insistiendo di un banda insisti cu e solucion ta na Hulanda, y di otro banda cu e solucion ta aki mes, ‘ta djis haya mester haya e persona corecto aki y nos lo ta eternamente feliz.’ Laga nos ta franco, no ta cualkier persona ta bay resolve e problemanan grandi cu tin na Colegio Arubano, y en general den enseñansa na Aruba.
Loke en todo caso hamas por ta e solucion, ta cuminsa ataca e organisacion mes y pio ainda, ‘single out’ e presidente y exigi su salida. E contesta di e presidente, entregando su retiro, posiblemente no tabata e miho contesta posibel, pasobra aunke e tabata parce un gesto civilisa y noble, e no ta e contesta adecua pa e actitud ofensivo di e ministro. Ta net na momentonan asina ta necesario pa para firme y laga e ministro sa cu e no tin nada di bisa den e fundacion independiente aki. Comprende bon: no ta bay pa coincidi cu e presidente o e fundacion den nan punto di bista, pero ta bay pa e principio di respet pa e entidad legal cu tin e derecho di organisa su mes manera e ta desea, y cu ken e desea. Gobierno ta en berdad e entidad cu na nomber di comunidad ta pone e medionan financiero disponibel, pero esey no por hiba nunca na arogancia ni exigencia di influencia unda no por tin. Loke si ta tarea di gobierno ta pa crea un cuadro di maneho cu claridad di obhetivo y di uzo di recurso, cu ta conta pa henter sector subsidia di enseñansa.
Awor, naturalmente Colegio Arubano ta un especie unico, unda ta trata di un scol bao di un fundacion catolico, pero unda necesariamente tur hende di tur creencia o no creencia mester tin acceso, basta nan ta cumpli cu e exigencianan cu e scol ta pone. Esey a haci cu e scol tabata yama un ‘Rooms-Katholieke school voor alle gezindten’. Ya cu esaki a ser crea asina, ta dificil pa cambia su base, cu ta uno di un scol no publico. Na luga di bringa pa drenta den e fundacion particular aki, gobernacion, si ta desea di tin un scol unda tin un regimen di supervision gubernamental directo, lo mester pensa na crea un scol publico banda di e fundacion aki. Den otro sectornan di enseñansa ta esey ta loke a sucede y aki tambe e ta posibel. Si esey ta e caminda cu gobierno kier bay, no tin argumento valido pa para esey.
Sin embargo, nos ta mira aki atrobe un aspecto politico den henter e asunto. E ministro ta fulmina henter ora contra un persona cu ta traha pa Prome Ministro. Den experiencia y etica di trabao e ta compensa hopi pa e demas circo cu e ministro tin organisa den su alrededor. Algo a pasa o ta pasando eynan na nivel personal cu awor diripiente e presidente a entrega su retiro, talbes pa no sigui tira gasolin riba e candela interno. Esaki ta indica nos tambe cu nunca ta bon idea cu un subalterno di un ministro ta tuma un posicion asina importante na su encargo, aunke esaki no ta implica cu e no tin e habilidadnan pa hacie. Un persona den e posicion di responsabilidad ey mester por papia libremente, sin repercusion posterior otro caminda. Den e comunidad chikito aki esey no semper ta resulta facil.
En todo caso, si e ministro tabata di bandona fila politico ‘with a bang’, esaki por ta un pero e pregunta ta keda ta ki alma lo por beneficia di e accion aki. Mester tin un manera pa e ministro scoge su batayanan di otro forma y ademas tuma su tempo pa splica su maneho. ‘It’s about time.’
