Esnan cu pasa riba Vondellaan yegando na e plaza Betico Croes patras di Cas di Cultura, por topa cu un equipo kitando e asfalt riba e parking lot banda pabao, dilanti Sociedad Bolivariana. A ranca e asfalt existente, cu tabata den condicion aceptable, pues e pregunta tabata kico ta construyendo ey.
Bon Dia Aruba a pidi informacion cerca director di DOW cu a informa nos cu DOW ta den proceso pa kita e caminda entre Plaza Simon Bolivar y Vondellaan. Segun Director di DOW, Marlon Croes, plan ta pa traha un plaza nobo na e sitio. No a haya datonan specifico di cuanto inversion esaki lo ta y kico e intencion ta cu e plaza aki.
Aparte cu no tin claridad kico ta e plan, e pregunta cu nos mester haci si esaki ta e prioridadnan cu tin actualmente. E yobidanan di e temporada aki, cu no a termina ainda,a laga un cantidad di caretera den mal condicion y den diferente bario e poblacion no ta haya oido pa resolve nan problemanan cu nan tin cu caminda den mal estado. Nos ta comprende tambe cu placa ta scars, pues pakico ta esaki ta prioridad gubernamental?
