Tur aña sentimentonan mixto pa famia riba dia di Betico

Celebracion di Dia di Betico a cuminsa ayera mainta cu e ceremonia protocolar na Plaza Betico Croes unda e plaza mes a wordo inaugura cu un plachi cu ta describi e lucha y ‘sacrificio’ di Betico Croes na Ingles y Papiamento. Durante e dia varios otro actividadnan a tuma luga rond Aruba den honor y celebracion di dia di Betico.

Ministernan Xiomara Ruiz Maduro (MEP) cu Otmar Oduber (POR) tabata esunnan encarga pa desvela e plachi aki rondona cu e presencia di familiarnan y nietonan di e difunto libertador. “Alabes cu e ceremonianan a wordo haci, a resalta e echo tambe cu e plachi a wordo inaugura cu ta describi e momentonan importante di loke ta e lucha y bida di nos libertador. E ta algo hopi importante pa nos bishitantenan for di unda cu nan por bin, nan por pasa weita un plaza asina impresionante dedica na nos libertador. Y awor tambe lesa un tiki di dje,” minister Glenbert Croes (MEP) (tambe yiu di Betico) ta bisa Bon Dia.

Inspiracion di curashi

Un persona a comenta cu Betico Croes tabata e unico homber cu tabata tin e curashi pa enfrenta Hulanda y ningun mas a haci despues di dje. “Ohala e palabranan di Betico por inspira nos pa nos ta miho ciudadanonan riba nos pais,” otro ciudadano a bisa.
Prome minister di Aruba Evelyn Wever Croes (MEP) den su discurso tambe a enfoca riba e curashi di su omo. “Betico a demostra curashi. Curashi no kiermen cu bo no tin miedo. Curashi ta ora bo ta tuma e decision di haci lo corecto, a pesar cu bo tin e temor! Betico tabata sa cu e Status Aparte tabata lo corecto, y a pesar di temornan, a sigui cu e lucha. Esey ta curashi. E situacion actual ta similar. Mirando cuanto desaroyo nos pais ta pasando aden, pero no laga esey stroba nos. Ban demostra curashi pa enfrenta tur reto, y surpasa nan.”

“Mi ta kere cu Betico tabata den un epoca unda cu e mester a desplega e curashi. E curashi pa uni e pueblo a pesar di e segregracion cu tabata existi. Pero tambe e curashi pa sinta na mesa cu madre patria Hulanda pa logra algo historico. Cu te cu awe ainda ta notabel den henter Reino Hulandes,” parlamentario Hendrik Tevreden (MEP) ta bisa Bon Dia. El a sigui expresa cu e ta kere cu como politiconan nobo nan ta purba imita e tipo di actitud y forma di proceder aki. “Y sigur nos ta pidi Aruba completo, hobennan, generacionnan nobo cu ta sigui, pa tuma esaki como ehempel. ”

E parlamentario a conclui cu: “Mi ta kere cu Betico ta un politico cu a marka historia pa Aruba den su totalidad ora cu el a haci e cambionan historico cu el a haci pa Aruba. Nos di e generacion aki tin sapatonan hopi grandi pa por yena, naturalmente ta algo cu nos ta desea di anhela. Pero mi ta kere nos por logr’e den e union di un cu otro.”

Notabel tabata e presencia di parlamentario Michael Lampe di fraccion AVP cual aparentemente tabata e unico miembro di oposicion presente na e actividad aki. “Mi ta kere cu nos semper lo wak na Betico, como politiconan hoben, cu un bes mas mester tambe por crea e inspiracion di curashi cu el a trece pa dilanti.” El a sigui bisa cu pa su persona Betico ta para pa simbolo di curashi, determinacion y vision grandi cu sigur tur politico hoben por siña di dje, pero tambe esnan cu experiencia.

‘Un dia cu sentimentonan mixto’
Gisette F. Croes, yiu muhe di Betico Croes, a expresa ayera cu tur biaha e ta un sentimento mixto. “Pasobra bo ta celebra su historia pero no bida pa motibo cu e no t’ey. Como yiu mi lo prefera cu e lo ta akinan pa mi celebra su hacimento di aña huntu cu ne.” Algo cu e premier y varios otro familiar tambe a comparti ayera.