E programa di sostenibilidad pa islanan chiquito (SISSTEM) ofreci door di Universidad di Aruba (UA) a wordo reconoci door di e ‘Food and Agriculture Organization’ (FAO) di Nacionnan Uni.

Candidato cu a wordo nomina a wordo selecta a base di criteria estricto, entre otro:

  • A pasa caba e etapa di concepto y ta operacional pa 12 luna of mas;
  • Por escala cu un potencial fuerte pa crea un cadena di resultado cu lo mehora produccion di alimentacion y agricultura, nutricion, calidad di bida, salud y medio ambiente;
  • Ta contene caracteristicanan di demanda local (di e.o. comunidad, cunukeronan, piscadornan, publico general, gobierno, sector priva y donantenan);
  • Tin consecuencianan positivo y fuerte cu lo yuda catalisa e ‘value chain’ di sistemanan di alimentacion. Esaki lo nifica cu por ehempel solucionnan cu ta wordo aplica den eco-turismo of agri-turismo tambe ta wordo considera.

E plataforma di FAO lo seguramente mehora e intercambio di informacion cu lo facilita desaroyo. E lo trece hunto lider di gobiernonan, agencianan Nacionnan Uni y representantenan di un grupo amplio di organisacionnan di cunukero, NGOs, sociedad civil y innovadornan pa asina incuba, promove y escala solucionnan local y importa. Esaki seguramente lo yuda acelera solucionnan den agricultura, alimentacion y nutricion cu ta wordo relaciona cu e ‘Sustainable Development Goals’ (SDGs) den ‘Small Island Development States’ (SIDS).

Pa sostene un fluho constante di solucionnan innovativo, un plataforma pa solucionnan SIDS lo wordo lansa den e region pacifico e aña aki y lo expande gradualmente na otro SIDS den regionnan Africano, Indio, Mediteraneo, e region di lama zuid di China y e region Caribense. SISSTEM na UA a wordo identifica como un di e precursornan den educacion ariba e tereno di desaroyo sostenibel pa islanan chikito.

E prome forum bienial lo tuma lugar ariba 30 y 31 di augustus 2021. E tema lo ta innovacion y digtalisacion di solucionnan local y importa cu lo yuda mitiga e impacto cu COVID-19 tin ariba economianan y asina tambe yuda acelera e meta di e SDGs, relaciona cu sistemanan di agricultura y alimentacion, nutricion, salud, medio ambiente y finalmente resiliencia contra e impacto cu cambio di clima tin ariba SIDS.

E programa di SISSTEM cu ta wordo financia door di Union Europeo tin como meta pa yega na un cantidad grandi di studiantenan di Aruba y di e comunidad global di SIDS. Studiantenan cu tin nivel di VWO of HAVO of EPI y e Academic Foundation Year den direccion di ciencia of un otro nivel similar ta wordo encurasha pa aplica pa e programa bachelor pa eventualmente logra un diploma cu e titulo di BSc. in Sustainable Engineering.

E reconocimento di FAO ta constitui un paso nobo cual lo yuda e programa di SISSTEM na UA alcansa mas y expande e impacto positivo cu esaki lo brinda den futuro.