Diasabra ultimo riba rednan social, usuarionan a comparti un video na unda por mira e plataforma di perforacion marino cu ta ubica hopi cerca di Malmok bashando loke tabata parce un substancia scur lo cual a lanta preocupacion pa loke ta trata medio ambiente.
Den e post a publica lo siguiente:
“Vessel Balder (IMO 7710226, MMSI 35472100) nabegando bao di bandera di Panama y desde 1 di october den waf di Aruba, dilanti area costal di Malmok: Bo actividadnan ta legal? Bo ta cumpli cu leynan y tratadonan local y internacional di medio ambiente? #MARPOL #AB1993no72 (AB1997no34) – NO Polucion di zeta – NO Substancianan likido nocivo – NO Substancianan dañino den formanan paketa – NO Polucion di awa di riool – NO Polucion di sushi – NO Polucion di aire . MarPol ta un esfuerso mundial pa proteha ecosistemanan marino di polucion causa pa e actividadnan internacional di barco y actividadnan maritimo.”
E video a bay viral unda hendenan a cuestiona e ubicacion hopi cercano di e plataforma aki den awanan di Aruba y hasta activistanan di medio ambiente a bati alarma pa Ministerio Publico.
Ayera diadomingo, minister di Naturalesa y Medio Ambiente, Ursell Arends a publica riba su red social cu “Ayera algun ciudadano preocupa a bati alarma pa un plataforma di perforacion marino cu tabata parce di los algun substancia scur den nos awanan. Ta asina cu Vessel Balder, e plataforma concerni, ta den nos awanan nan pa mantencion. E awa cu ta los ta awa pa fria (cooling water). Havenmeester y DSA ta monitoria di cerca. E ta hopi bon pa semper keda atento cu nos medio ambiente y busca informacion corecto pa no drenta den panico,” e mandatario a splica.
