Plataforma anti-pobresa ta insisti pa pensioen mescos Hulanda na SXM

Plataforma anti-pobresa na Sint Maarten a reacciona fuertemente riba e echo cu a ‘fast-track’ hisa edad di pensioen pa asina cumpli cu un di e condicionnan pa sosten di likides di Hulanda. E plataforma ta haya cu pa garantisa cu e pensioen ta riba liña di pobresa, e mester ta na nivel di Hulanda.

Durante nan conferencia di prensa semanal, e plataforma a declara cu nan no ta di acuerdo cu e legislacion nobo referente edad di pensioen y e suma cu ta haya ora yega e edad di pensioen. Nan ta haya cu e pensioen mester ta dobbel di loke gobierno a propone y cu parlamento a aproba.

“E ley pa hisa edad di pensioen di 62 pa 65 aña di edad tabata fast-tracked pa conseho di minister y parlamento di Sint Maarten pa cumpli cu un di e condicionnan pa sosten di likides imponi pa gobierno Hulandes y secretario di estado Raymond Knops”, e plataforma a declara den nan conferencia di prensa.

E plataforma anti-pobresa a cuestiona e rason pa hisa edad di pensioen, declarando cu no tin un deficit structural den e fondo di AOV. E plataforma e subraya cu e reservanan di AOV ta 18 biaha mas halto di loke ley ta prescribi. “Minister di salud, desaroyo social y labor a hasta logra hisa e pensioen cu 11 porciento, di NAf. 1,116 pa NAf. 1,240”, e plataforma a bisa.

Nan a sigui bisa cu e minister kier a subi e pensioen mas, pero su conseheronan no a lag’e haci esaki pa mas cu 11 porciento pa asina mantene e fondo saludabel. E plataforma a sigui cuestiona e 124 florin adicional cu lo paga pensionadonan cu pasamento di e ley nobo, notando cu esey no ta haci cu e ta yega na un ingeso sostenibel.

“Esey ta 2.30 dollar pa dia, ni suficiente pa tuma bus di St. Peters pa playa y pa bay bek cas. E no ta provee un ingreso di pensioen cu un hende por biba di dje”, e plataforma a agrega.

Segun e plataforma, e pensioen maximo pa grandinan na Hulanda ta 1,226 euro, cual lo ta ekivalente na 1,398 dollar of NAf 2,516. “Basa riba e rapport di Transparency International, e pensioen maximo aki lo ta adecua pa un pensionado na Sint Maarten pa asina e no ta den pobresa”, e plataforma a declara.

E plataforma ta considera e echo cu pensioennan na islanan BES ta 41 pa 42 porciento mas abou cu Hulanda, y cu na Sint Maarten nan ta 51% mas abou ‘discriminacion geopolitico’.

E sindicatonan liga na WICLU ta demandando un proteccion social igual den henter Reino, cual ta nifica un pensioen maximo di biehes na mesun nivel, esta, balora na 1,226 euro. “Den otro palabra, mas cu dobbel e suma cu a pasa den ley na parlamento”, e plataforma anti-pobresa a conclui.