“E desperdicio domestico y comercial pa dia ta alarmante pero loke mas ta resalta ta e tipo di material cu e comunidad ta cumpra diariamente cu ta visibel rond di nos isla sea den area publico of den mondi y riba e landfill situa na Parkietenbos.” E situacion di desperdicio ta keda un topico di importancia den nos comunidad.
E prome stap mester ta pa nos tur ta determina y haci un cambio via di haci menos uzo di articulonan di plastic na cas y of trabou pa yega na desperdicionan hopi mas sano y mas facil pa wordo asimila door di medio ambiente. Menos uzo di plastic ora di come ya caba ta minimalisa e desperdicio malo grandemente. Serlimar ta recorda alabes, pa sigui haci uzo di e amplio servicio pa yuda deshaci di desperdicio residencial pero tambe comercial. Serlimar ta pasa cu su trucknan pa piki tur desperdicio como tambe ofrece containernan di diferente size pa ora di haci limpieza. Unabes cla, nan mes ta busca e containernan y asina ta facilita e proceso. Sin lubida cu Serlimar ta asisti den e area di limpieza pa lag’e manera mester ta durante cualkier evento.
Den e cuadro aki, Serlimar kier a conscientisa e pueblo tocante e consecuencianan di uzo di material di plastico cu no solamente ta dañino pa e flora y fauna, pero e ta tarda hopi pa e wordo procesa door di medio ambiente. Aki na Aruba e material di plastic ta un problema enorme di desperdicio. Den esaki Serlimar ta urgi henter e pueblo di Aruba pa haci un cambio den esaki ya cu e problema aki ta uno cu lo empeora despues di tempo y e solucion ta den nos man.
E cambio mester wordo haci den bida diario, esta tanto na cas como na trabou, unda mester haci uzo di materialnan cu ta degrada mas lihe den e medio ambiente y cual ta nifica cumpra materialnan cu por wordo uza mas biaha of pa un tempo mas largo. E custumber di re-uza material no ta wordo considera di importancia riba nos isla ni tampoco e tipo di material cu cada pakete tin, sin embargo ta alarmante pa bisa cu un simpel foam ta tarda 50 aña pa degrada y e material di plastico hopi mas. Aworaki na casnan ta haci hopi uzo di bakinan di plastic pa warda cuminda, cual por ta dañino tambe pa salud di e ser humano. Mientras cu si cumpra producto di glas, esaki por wordo uza pa hopi aña y glas ta mas facil pa degrada.
Ley y Task force
Den un edicion anterior di Bon Dia a wordo publica cu e ley aki a drenta na vigor riba 1 di januari 2017 cu iniciativa di parlamentario Donny Rasmijn, kende a lansa e campaña di conscientisacion y preparacion pa introduci e cambionan aki.
Na luna di april gobierno a institui un task force cu lo bay percura pa cumplimento di ley di saco di plastic. segun City Inspector, e control riba tiramento di sushi den mondi lo bira mas pisa di awor pa dilanti. Desde dia 2 di april tin un meldpunt (punto pa haci denuncia) cerca City Inspector caminda cu esaki lo wordo haci via campaña di conscientisacion tambe pa nos comunidad. Cu tur loke tin di haber aworaki nan riba e tereno di leynan cu tin di haber cu nos naturalesa y medio ambiente por wordo denuncia eynan.
