Ayera durante Green Aruba Conference por a mira varios presentacion y discusionnan cu a wordo hiba dilanti relaciona cu e tema di desaroyo sostenibel y energia. En particular Bon Dia a haya interes pa un organisacion cu awo ta cuminsando cu proyectonan interesante den ramo di waste management: Plastic Beach Party.

Ora ta trata con nos ta anda cu nos sushi, no ta un secreto cu tin un gran falta di conscientisacion den nos comunidad. Bo no mester bay mucho leu pa mira den un mondi cerca di cas sushi di tur tipo: plastic, carton, glas y mucho mas. Tin te hasta varios dumpnan ilegal rond di nos isla cu ta parce di kier aspira pa bira manera nan mayor Parkietenbos. Aunke promesanan di banda di gobierno a wordo reitera bastante biaha den pasado, e realidad ta cu Aruba ta importa un cantidad gigantesco di material cu eventualmente ta contribui na e Sero Parkietenbos.

Pero e situacion alarmante ta yama pa bin na solucionnan mas simplistico cu cera Parkietenbos of no; mester bin mas innovacion y espacio pa ideanan nobo forma den e manera con nos ta trata cu nos sushi. Nos na Aruba por mustra cu tin interes pa bin cu e ideanan nobo den waste management. Un di e ideanan aki ta Plastic Beach Party.

E iniciativa aki di Brenchie’s Lab a cuminsa cu un idea simpel: con pa integra un circle economy den e maneho di sushi riba nos isla. Brenchie’s Lab den pasado ya caba tabata uzando plastic como material cu nan 3D printers situa na Academy of Fine Arts & Design. Pues e tabata un no-brainer pa despues cu Brenchie’s a bira e prome makerspace na nos isla e sigui innova den nan spirito do it yourself.

Brenchie’s a haci un campaña di crowdfunding pa por arma mashinnan diseña pa e proyecto Precious Plastic. E curason di e organisacion ta Christie Mettes y Tony Sevold, dos persona cu pa hopi tempo ta ocupa nan mes cu tecnologia do it yourself y igualmente ta tene medio ambiente na pecho.

Servicio di reciclahe di plastic

Despues di un proceso intensivo di arma mashin y un fase di testing porfin e mashinnan di reciclahe a wordo instala na Academy of Fine Arts & Design. Te cu awo e fundacion a cuminsa cu un servicio unda personanan priva y companianan por pidi pa nan busca e plastic cu nan originalmente tabata di bay tira den dump. Manuel Rojas, kende ta traha pa e fundacion ta spica cu e servicio di pick up ta costa solamente 10 florin si e organisacion kier pa Brenchie’s limpia y sortia e plastic pa nan.

En caso cu e persona cu kier recicla kier separa y limpia e plastic su mes e servicio ta costa solamente 5 florin. Si no ta pidi e fundacion pa facilita e servicio e ora ey e persona no mester paga nada pa trece plastic y bay den henter e proceso di surtia y muli e plastic pa despues crea un producto.

E mashinnan cu Brenchie’s tin disponibel ta entre otro un shredder y un extruder destina pa crea forma di obhetonan. Aki e elemento di economia circular ta wordo integra: tur plastic cu wordo uza pa Plastic Beach Party ta wordo transforma den un producto nobo. Un cup, tayo, mat pero tambe por ehempel coy hunga. E proceso aki tambe ta envolvi ciudadanonan cu interes den diseño of posiblemente diseñadornan studia.

Cada dialuna Brenchie’s Lab ta tene su Maker Day na e academia di arte, unda tur persona cu interes den diseño 3D y digital por pasa libremente y cuminsa cu un proyecto.