Cu e coleccion y reciclahe di plastic pa un di e cadena di hotelnan mas grandi di Aruba, e organisacion Arubiano Plastic Beach Party (plasticbeachparty.com) oficialmente ta lansa su servicio pa recicla plastic na Aruba.

Esaki nan ta comunica den e siguiente relato.

Durante e fase di test, nan ta bisa cu nan a colecta y recicla 108 kilo di plastic for di dos hotel di e cadena Divi Resorts. E plastic aki a wordo procesa como materia prima cu por wordo uza pa produci un variedad di producto nobo. “E succes di e piloto a prepara e escenario pa nos tin mas impacto den futuro, y asina nos por cuminsa colecta mas plastic y crea producto sostenibel cu esaki”, segun Christie Mettes, co-fundado di Plastic Beach Party.  

Como empresa social nan ta splica cu na a traha varios mashin pa corta plastic y produci materia prima pa traha producto nobo di plastic. Uzando diseño for di internet pa haci esaki. “ E productonan cu nos ta trahando di e plastic recicla ta diseña pa reduci uzo di plastic cu ta wordo tira afo, por ehempel ta inclui copi cu por wordo re-usa, bari sushi, y productonan specifico manera trofeo, yabero, joyas y tegel pa muraya. Pero manera nos sa, tur cos por wordo traha di plastic, mas ainda cu tecnologianan nobo manera 3D printing”, segun sra. Mettes ta splica.

Divi ta e prome hotel cu a uni nan mes na e esfuerso pa recicla plastic, e compania ta bisa. E empresa ta spera cu mas hotel como tambe, famianan y otro empresa uni nan mes na e esfuerso pa recicla plastic. Aunke e meta primario di e iniciativa ta pa proteha e medio ambiente di Aruba, sra Mettes ta menciona cu sin un modelo financiero esaki no lo ta sostenibel.

6000 ton plastic importa den 1 aña

Aruba a importa mas di 6000 ton di plastic na 2015 (UN Comtrade, 2016), casi 50% di e esaki a wordo uza den e sector turistico, e compania ta bisa. “Actualmente, mayoria plastic ta termina na Parkietenbos. Sin barera entre lama y e dump y cu candela frecuente, hopi di e plastic aki por drenta nos aire y lama. Afectando no solamente nos mangrove y reef, pero tambe nos calidad di bida y salubridad.”

Sra. Mettes ta sigui splica: “Plastic ta un di e problemanan mas grandi pa nos medio ambiente special e bida marino, no na Aruba so pero na mundo henterNa Aruba nos ta depende di nos economia turistico, nos beachnan y nos sector di pesca. Pa nos mantene esakinan nos tin cu stop cu e ciclo di consumo di plastico y processa e plastic cu ta wordo usa den un forma responsabel. Pa haci esaki nos tin cu cambia con nos ta wak plastic; pa e no ta algo cu bo por tira afo y lubida di dje.”

Divi Resorts ta e prome hotel pa cuminsa recicla plastic cu compania. Ya caba Divi a inverti den energia solar, reciclahe di awa, copi reusable, y no ta uza straw di plastic como resultado Divi a wordo reconoci door di varios programa di certificacion. Den relato nan energy manager St. Jago ta comenta: “Divi ta orguyoso di ta e prome hotel na Aruba pa inverti den e reciclahe di plastic. Esaki ta un inversion importante pa Aruba su beachnan y e industria turistico. Nos ta spera cu hopi mas hotel lo sigui.”