Cu prome minister Mike Eman no a screen Alfonso Boekhoudt pa e puesto di gobernador no ta problema, segun minister di Asuntonan di Reino Ronald Plasterk. Den contestacion di preguntanan di lider di D’66 Alexander Pechtold, e ta bisa cu e screening di Boekhoudt pa e puesto di minister plenipotenciario tabata suficiente.
Plasterk a responde riba preguntanan di Pechtold, basa riba articulonan recien den Antilliaans Dagblad den cual ta sugeri cu e nombramento di Boekhoudt pa gobernador lo no a bay segun reglanan. Pechtold a puntra pa detayenan di un supuesto protocol di nombramento cu Conseho di Reino lo a acorda riba dje na 2001. Pechtold kier a sa si e nombramento di Boekhoudt tabata segun e protocol of no. E tabata kier a sa tambe si e nombramento unilateral di parti di Conseho di Reino – di cual Plasterk anteriormente a bisa cu e no tabata uno cu lo merece un ‘premio di beyesa’ – a crea un precedente pa futuro nombramentonan.
Plasterk den su contestacion a duna di conoce cu e protocol na cual Pechtold a referi na dje no ta mas cu un ‘notitie’ tocante entre otro Statuut y nombramentonan. Den e notitie aki cu riba dje no tin ningun peso legal ta indica cu pa loke ta nombramentonan, ta para cu paisnan den Reino semper lo purba busca un candidato na tempo – pa ta exacto no mas tarda cu seis luna prome cu termino di e gobernador saliente termina – cu por conta cu sosten di henter Conseho di Reino. Esaki sinembargo ta un procedura informal. Conseho di Reino na final ta esun cu ta dicidi y ta laga minister di Relacionnan di Reino presenta un candidato na Rey pa wordo huramenta. Plasterk ta bisa cu semper lo keda purba pa traha di e forma aki tambe den espirito di e notitie. E minister siguientemente a argumenta e posicion di Conseho di Reino, ripitiendo su ponencia cu ya caba a duna na Tweede Kamer anteriormente, cu Aruba no a logra produci un candidato pa e puesto di gobernador na ora cu por a conta cu sosten di Conseho, a pesar cu e di dos termino di Fredis Refunjol tabata cabando y tabatin contacto regularmente entre Hulanda y Aruba riba e topico.
Finalmente Pechtold a puntra Plasterk si e prome minister di Aruba, conforme cu articulonan 6 y 7 di Reglamento di Gobernador, a screen Boekhoudt pa e puesto di gobernador di Aruba. Plasterk su contesta riba esaki ta cu esaki no tabata e caso. Sinembargo a screen Boekhoudt caba pa su huramentacion como minister plenipotenciario na Den Haag. Den combersacion entre Plasterk cu Boekhoudt e topico di screening a wordo discuti tambe, asina e minister Hulandes di Relacionnan di Reino a duna di conoce.
