Minister di Asunto di Reino di Hulanda, Ronald Plasterk a bishista diferente luga dialuna. Riba potret por mira su bishita na Marinierskazerna pa cu e proyecto di formacion social. Gobierno di Aruba a manda un relato riba e bishita aki. Segun gobierno e minister Hulandes a elogia e proyecto aki. Pero mas importante e relato tambe ta menciona e situacion na Venezuela y e consecuencia pa Aruba:
Pa loke ta e preocupacion grandi cu ta reina na Aruba pa e situacion tenso na Venezuela cu su consecuencianan pa e islanan di Reino a puntra Minister Plasterk si e no ta kere cu lo mester introduci visum pa Venezuela. “Laga mi cuminsa na bisa cu mi ta mira cu e problema ta uno serio y creciente. Un problema den e pais mas grandi cu ta mas cerca di e frontera di Reino Hulandes cu ta Venezuela. Na Den Haag no semper e situacionnan aki ta wordo mira cu un wowo skerpi, asina ta cu mi lo hiba tur loke mi a tende aki bek Den Haag cu e mensahe cu e ta un problema cu ta birando mas grandi cada dia. Loke mi ta compronde tambe ta cu di un banda kier sigui atrae e turista cu placa di Venzuela y Colombia, pero di otro banda kier evita tambe cu ta bin hende aki cu tin otro intencionnan, entre otro pa score placa cash. Mi tin comprension pa e situacion y lo discuti esaki cu mi colega di Asuntonan Exterior.”
Tambe gobierno a bisa cu minister Plasterk a indica cu mester cuminsa traha riba un ‘geschillencommissie’ pa henter e Reino. Lesa aki bou locual gobierno a skirbi:
Cambiando di tema Minister Plasterk riba e pregunta con ta para cu e ‘geschillencommissie’ pa Aruba, el a bisa cu no solamente Aruba, pero den henter Reino mester bin cu un comision asina. “Mi a papia riba e tema aki cu Minister President Eman awemainta. E tabatin aprecio pa e hecho cu mi ta avansando riba e tereno aki. Eman a bisa mi cu e lo discuti e asunto aki pa haya sosten di Staten entre otro.” Mirando e hecho cu apesar di loke a sali afo di e peticion haci na Raad van State y cu ainda no a bin un acuerdo pa un geschillencommssie, Plasterk a contesta cu e commisie aki ta bay bin, pasobra e ta para den Statuut, pero te ainda no sa kico exactamente mester bin den dje ya cu ta hunto mester trata na yega na un consensus. Plasterk a bisa cu aki ta trata di algo cu mester ta cuidadoso cu ne, pero cu ya ta durando casi 5 aña caba y cu enberdad e tempo a yega pa haci algo. Esey ta tambe un di e motibonan di su presencia na Aruba. “E areglo cu podise ta bin awor no ta uno definitivo, pero si uno cu nos por cuminsa traha cu ne. Mayan mi ta bay Corsou na unda mi lo trece e punto aki dilanti y pronto tambe na Sint Maarten. Nos ta trahando duro pa yega na e areglo.”
