Den un carta pa Conseho di Minister di Reino, Minister Ronald Plasterk a recomenda Alfonso Boekhoudt como candidato pa Gobernador di Aruba.
E carta aki a wordo manda pa Conseho di Minister di Reino dia 29 di september ultimo. Akiden minister Plasterk ta indica cu e di 2 termino di Gobernador Fredis Refunjol a termina desde dia 1 di mei ultimo, pero a base di articulo 4 di reglamento pa Gobernador di Aruba, ta bisa cu e Gobernador lo keda den e funcion te ora cu e proximo Gobernador tuma encargo. Esaki segun Plasterk ta un solucion a corto plaso.
El a indica cu Aruba tabata den contacto cu posibel candidatonan pa gobernador, sin resultado. P’esey Plasterk ta pidi den e carta dirigi na Conseho di Minister di Reino, pa vota pa su proposicion di Alfonso Boekhoudt. Hunto cu e carta tabatin e CV di e Minister Plenipotenciario.
Despues cu Conseho di Minister di Reino a divulga cu Boekhoudt ta e candidato pa gobernador, gobierno di Aruba no a duna niun declaracion. Te awo Prome Minister Mike Eman no a duna niun reaccion. Segun fuentenan rond di e Premier, e gabinete no ta contento cu e nominacion di un banda di Boekhoudt.
