“Mi no ta mete, tur cos ta cu CAFT”
Ken ta bay kere cu Plasterk a bin Aruba, solamente pa un bishita di cortesia, unda el a bishita refineria y e proyecto di formacion social di hoben, y a combersa cu un delegacion di comercio. Aunke e agenda divulga na prensa tabata menciona claramente situacion di financia publico, despues di su encuentro cu e ministronan concerni (Eman y Bermudez) Plasterk a duna e impresion cu a delibera solamente riba futuro Fondo di Desaroyo Aruba. Na aeropuerto el a declara cu e no tin pakico ta envolvi den e fase aki, ya cu e asuntonan tin cu atende nan awor cu CAFT, ta p’esey nan t’ey.
Loke Plasterk a declara ta cuadra cu berdad, den e sentido cu e ta subi avion pa sigui su biahe, pero cu a keda trabao pa haci na Aruba encuanto presupuesto 2016. Y e trabao ey ta pa gobierno di Aruba caba di regla cu CAFT, pa dentro di pronto entrega un version definitivo di presupuesto, cu por carga aprobacion di CAFT, y di gobierno di Reino finalmente. Yega na e punto ey ta imposibel sin cu a papia riba e puntonan principal cu ta defini e cuadro general pa presupuesto 2016, y specificamente e puntonan clave cu CAFT a trece dilanti caba. Remarcabel ta loke ministro di Financia Bermudez a declara cu proximamente presupuesto lo keda cla y cu e por bay Parlamento otro siman.
Straño pasobra Raad van Advies ni sikiera a haya e version definitivo di presupuesto pa duna su opinion. E version aki no ta consisti solamente di tur documento corespondiente, pero tambe di un Memoria Splicativo modifica unda mester indica con a tene eventualmente cuenta cu e conseho di CAFT. Pues a pesar cu ministro Bermudez a declara (segun Noticiacla) cu CAFT a raporta caba y cu despues di aprobacion di e presupuesto pa conseho di ministro, e por bay Parlamento, e berdad ta cu keto bay e proyecto di ley mester bay Raad van Advies. E organo aki mester sigur un tres pa cuatro siman pa traha riba nan conseho. Confronta cu e pregunta cu e presupuesto ta coriendo peligro di no keda cla prome cu 15 di december, tanto Bermudez como Plasterk a mustra cu mester tin flexibilidad pa loke ta e fecha cu e presupuesto lo keda cla. Esaki tin algo di logica mira for di nan punto di bista. Compara cu aña 2014 y 2015 unda presupuesto a keda cla na mita di aña, awor no ta cumpliendo cu e fecha final den e ley di CAFT, pero en todo caso tur cos por keda cla prome cu aña caba. Si nan ta desea di mira esey como progreso, so be it.
Scuchando e dos mandatarionan, tin di tur manera fuerte indicacion cu a delibera riba e cuadro general di e presupuesto unda cu gobierno di Aruba lo bay tene cuenta cu e deseonan di CAFT. Si esey no tabata e caso, ya caba tur e dinamita pa e siguiente explosion lo t’ey atrobe. Ambos banda ta duna e impresion di kier tene tur cos nechi, basta gobierno di Aruba haci loke e mester haci, pa no haya su mes confronta cu un desaprobacion di CAFT despues cu e presupuesto keda aproba. Ta sinti cu tin cierto malestar den fila di gobierno cu e ley di CAFT, cu no tin solamente un trayecto di aprobacion prome cu aproba e presupuesto, pero tambe un control despues cu e caba di pasa Parlamento, asina ta cu si acaso den Parlamento haci cambio cu CAFT/gobierno di Reino no gusta, ta sigui un conseho negativo y e proposicion na gobierno di Reino pa duna un ‘aanwijzing’ pa cambia e presupuesto manera instrui.
Si nos observa con e ley di CAFT ta manera ta bisa na Hulandes “dichtgetimmerd” (“claba, cera”), cu proceso di control prome y despues di aprobacion den Parlamento, plus un trayecto di control durante aña cu un rapport financiero cada tres luna, por bisa cu Hulanda no a laga ningun espacio habri pa haya sorpresa na caminda. Y esey por ta contribui awor na un posicion menos intransigente di banda di Aruba, ya cu nan sa cu si nan no ta bay di acuerdo awor, of si kier hunga wega den Parlamento cun’e, di tur manera un dado momento ta bin un intervencion cu ta pone tur cos na nan luga.
Di manera cu, mientras di tur dos banda ta bisa cu apenas a papia di presupuesto, diripiente e indicacionnan cu no tin avance pa termina presupuesto cu un aprobacion di CAFT ‘por arte de magia’ awor si tin e perspectiva ey. Bon noticia pa nos, pasobra ningun hende ta sinta warda mas mal noticia ainda. E siguiente pregunta ta con nos leynan di reforma fiscal ta bayendo. Pa loke ta e abolicion di wegenbelasting y su inclusion den accijns di combustibel: esaki a keda mata pa Prome Ministro caba. Igualmente e ley laboral encuanto contracto cortico. Awor ta wardando si e reforma fiscal (ABB) lo bay core e mesun suerte aki.
