E planta di WEB ta den condicion optimal, asina director di WEB Luis Oduber a declara na Bon Dia Aruba. Pero el a agrega cu logicamente tin ekiponan cu tin biaha no ta disponibel pa bay den servicio, ya cu nan ta den periodo di mantenemento.
Actualmente nos planta productor di awa y coriente -cu ta un di e mas grandi di mundo- tin capacidad pa atende debidamente cu e demanda di nos comunidad. Sr. Oduber a bisa cu tin dos componente, un tin di haber kico e demanda ta cu ta averahe di 100 megawatt y e por a bay te cu 120 pa 125 mega watt; y parti di anochi e por baha entre 85 pa 75 mega-watt.
Pero tambe di e periodo di aña ya sea di hopi mas calor of no ta hunga un rol den e demanda di e servicio aki. Aworaki cu ta un poco mas fresco e demanda ta mas abou. Esaki ta wordo ripara mesora den nan produccion ya cu den oranan di anochi e ta baha. E uzo di airco cu ta e artefacto cu mas ta hala coriente ta baha debi cu den oranan di madruga ta hopi fresco te hasta friu.
Tambe e consumo di awa ta depende di e temporada di yobida riba nos isla. Na januari caminda awa a yobe regularmente, e demanda di awa a baha. Pero prome cu esey te cu november tabatin un secura y e demanda di awa tabata hopi halto.
Estimulo y tecnologia
A pesar di nan campaña di conscientisacion, sr. Oduber ta haya dificil pa nan wak si e mensahe berdaderamente ta yegando efectivamente cerca nan clientenan cu ta nos comunidad en general. E tipo di estimulo pa yuda baha gasto den consumo di awa y coriente den nos comunidad ta yuda hopi. “Tur loke bo por economisa ta conveni e cliente.”
Sinembargo esun mas efectivo ta e diferente artefacto cu actualmente ta demanda menos consumo di coriente cu antes. Un artefacto cu ta ranca hopi coriente ta airco of frishider, pero aworaki danki na e sistema inventer, te hasta wasmashin ta wordo fabrica cu e tecnologia aki, e ta hala menos coriente y awa. E ta un inversion cu e consumidor ta haci den artefacto mas moderno cu despues nan ta saca nan inversion na termino largo. Tin diferente tecnologia led cu ta mucho mas faborabel pa spaar energia y pero tambe instrumento pa spaar awa.
