Planea pa reeleccion… Y no pa mehoracion…?

Pa varios motibo e debate tan anticipa di Camara di Comercio a decepciona. Esey no tabata responsabilidad solamente di e partidonan politico, sino tambe di e organisador. En general nos a haya falta di e aspectonan clave den e topiconan selecta. Tuma por ehemplo enseñanza. A presenta e caso, enberdad urgente, di e resultadonan pober di nos studiantenan den exterior, principalmente na Hulanda. Un aspecto sin duda importante, pero unda no a toca e problema cardinal: e preparacion pesimo den enseñanza basico cu ta resulta den un dominio deficiente di e idioma cu ta requeri cierto nivel pa sigui un estudio avanza. Pa di tantisimo vez ta dal vuelta rond di e asunto pero no ta ateriza na e curazon di e asunto. Asina tur hende por ta di acuerdo cu algo mester sucede, pero nos no ta carga ningun speranza, mirando e manera cu ta trata e asunto, cu esnan cu a sigui e debate a haya un poco mas conocimento di e materia. Nos por conclui cu realmente no tin un plan, ni cerca gobierno ni cerca oposicion, kico realmente mester bay haci.

Si nos di berdad kier cuminza analiza e problemanan di enseñanza na un manera debido, ban cuminza cu e cifranan. Kico nos ta gasta cu enseñanza anualmente? Y cuanto nos lo mester ta hinca den enseñanza pa ta na un nivel aceptable, por ehemplo segun e norma di Nacionnan Uni? Segun e norma internacional aki un pais lo mester ta inverti como minimo 6% di su Producto Interno Bruto nominal (PIB; GDP) den e sector aki. Nos a haci un comparacion chikito entre aña 2019 y presupuesto 2025. Na 2019 e gastonan total di enseñanza tabata Afl. 276 miyon, riba un GDP di Afl. 6078 miyon; un porcentahe di 4,5%. Pa 2025 gobierno a presenta gasto total pa ministerio di Enseñanza y Deporte di Afl. 319 miyon. Como cu nos no a logra isola e cifra corecto pa enseñanza so na e momento aki, nos a tuma e suma completo di enseñanza y deporte den e comparacion cu e GDP anticipa pa 2025: Afl. 7644 miyon, cu ta duna anto 4,2% di GDP… Si nos aplica e suma corecto pa enseñanza, e porcentahe lo baha bao di 4%, leu di e 6% cu nos lo mester ta destina na enseñanza.

Awor claro, nos ta anticipa cu ta bin bisa cu mester tene cuenta cu e cantidad di alumno, sigur den enseñanza basico, a baha considerablemente. Esey ta corecto y e medio aki a trece esey dilanti na mas cu un ocasion. Pero, si esey ta e tendencia, anto e conclusion corecto di un planificador mester ta cu lo mester bira mas facil pa reserva placa pa e cosnan cu mester haci pa mehora CALIDAD di enseñanza. Esey ta si gobierno ta tuma e standard internacional menciona como un guia pa su inversion den e sector aki. Lamentablemente esey no ta e caso y nos por mira si cu entre 2019 y 2025 a bin un aumento considerable di gasto di e ministerio, aunke tin menos personal riba payroll di enseñanza, pero cu e placa extra ey ta pa paga e aumento di salario di mas di 10% cu gobierno actual a regala tur ambtenaar y otro asalariado cu ta cobra di fondo di Pais Aruba, entre nan tur personal di e fundacionnan involucra den enseñanza. Di e manera aki lo por gaba cu ta hincando mas placa den enseñanza, pero no den proyecto pa mehoracion di e sector, sino puramente pa paga mas salario. A proposito, den e conseho di Raad van Advies (RvA) encuanto presupuesto 2025 di Pais Aruba ta mustra riba e hecho cu na 2024 so caba e indexering aki a costa mas di Afl. 21 miyon, cu tabata pa seis luna so, es decir cu pa 2025 e suma total lo ta hopi mas halto. Di e manera aki segun RvA esaki ta e factor mas importante den aumento di gasto total di gobierno pa 2025. Pa colmo, RvA no por a topa cu cifra concreto di cuanto e aumento aki ta bay costa nos. Nos, pasobra ta nos ta paga… Nos ta supone cu ningun partido lo ta dispuesto pa trece e realidad aki dilanti, mucho menos den un debate, pasobra ningun ta desea di daña relacion cu e miles di privilegiado cu ta cobra den sector publico. E consecuencia ta cu no ta resta placa pa hinca den mehoracion di e sector; loke realmente gobierno ta haciendo ta inverti den reeleccion, y no den mehoracion, tremendo planificacion…

Awor algo tocante e tema mes cu ta asina importante: mehoracion di calidad di nos enseñanza. Esey no ta un problema so pa esnan cu ta logra termina enseñanza secundario aki y ta bay studia den exterior. E ta un problema a traves di henter e sistema educativo, pasobra e base di e problema ta den e atraso den dominio di un idioma mayor cu ta sobrepasa e limitacionnan cu un idioma asina chikito manera Papiamento tin. Cu esaki nos ta bisa cu nos ta contra e medida di impone Papiamento den enseñanza basico como idioma di instruccion? No, pero esey no ta contesta e pregunta con nos ta yega na percura pa desaroyo di idioma, di e tres idioma grandi cu importante pa nos comunidad y economia, di tal forma cu na tur nivel cada studiante por sigui studia cu exito. Den tur e fanfaria di e introduccion reciente, e pregunta clave aki a keda colga. Y como cu ta mira solamente planificacion di reeleccion, no ta mira mehoracion…

LJMADURO – 18-NOV-2024