Directiva di Centro di Bario Playa Pabao ta anuncia cu e aña aki atrobe nan ta organisa nan “plan vacacional”. E actividad aki ta cuminsa dialuna 22 di juli y ta termina diabierna 2 di augustus cu un actividad social pa henter famia.
E programa ta consisti di weganan recreativo tanto paden cu pafo, Community Pool, rond trip pariba y pabou di brug, ban hisa fli, show di judo y hopi actividad mas pa entretene nos muchanan. Mayornan por inscribi nan yiu na Centro di Bario Playa Pabao tur dia, mainta di 8’or pa atardi 6’or. Lo cobra e suma di Ffl 100.00 florin (pa dos siman) pa mucha cu ta encera tur cos.
Tur mainta 10’or e muchanan ta ricibi un sandwich y juice. E actividad aki ta pa muchanan di 4 aña pa 12 aña. Pa motibo organisatorio e ultimo dia pa inscribi ta diabierna 19 di juli. Directiva di Centro di Bario Playa Pabao kier a recorda mayornan pa inscribi nan yiu na tempo pa asina nan no tin di bay riba lista di espera.
Un informacion importante ta cu portanan di nos centro durante nos “plan vacacional” ta habri mainta 8or y pa 12or PM mayornan por bin busca nan yiu. Desde awor caba Directiva di Centro di Bario Playa Pabao ta desea nos muchanan di Playa Pabao y di Aruba en general un dushi vakantie.
