Recientemente e Plan pa subsidio di salario a wordo entrega na CAft pa su evaluacion. Esaki ta pa asina Reino Hulandes por brinda yudansa na Aruba den forma di sosten di likides pa por ehecuta presupuesto 2020.
E plan aki ta pa subsidio di salario pa comercio por wordo yuda pa paga salario di trahadonan y di e manera aki logra conserva cupo di trabou den e periodo di e crisis di COVID19. E plan aki mester wordo presenta na CAft pa su evaluacion pa asina nan por conseha Conseho di Minister di Reino y pa e organo aki na su turno por tuma un decision dia 1 di mei proximo.
A consulta cu gremio comercial.
Diahuebs ultimo Minister Maduro a entrega e peticion pa subsidio di salario na CAft pa su evaluacion, despues cu a haci e calculacionnan necesario y a haci e debido consulta cu gremio comercial ATA, AHATA y Camara di Comercio. Pa 3 siman largo e gremionan comercial a haya oportunidad pa por a participa na e formulacion di e condicionnan general bou cual Gobierno ta ofrece e subsidio di salario.
Gobierno ta yuda comercio pa paga trahadonan, 80% di e salario bruto inscribi na SVB, cu un maximo di 5850 florin, ora cu tin perdida di minimo 25% di perdida di entrada, pa asina por mantene e trahadonan na trabou. Pa bin na remarca pa e yudansa aki, e compania no mester a kita trahado despues di 15 di maart 2020, mester sigui paga e trahado 100% di su salario, cu excepcion si a yega na otro palabracion di salario, y e subsidio ta wordo paga a base di e informacion di salario cu ta conoci na SVB riba 15 di maart 2020.
Gobierno ta trahando awor aki riba e condicionnan y detayenan di e yudansa den forma di subsidio di salario, y asina cu e informacion aki ta conoci lo comparti e informacion.
