Plan Nacional Multisectoral di Prevencion: ‘Aruba a bira un pais no saludabel y e plan ta pa cambio di mentalidad’

Ayera mainta na Hotel Marriott, gobierno di Aruba a lansa e Plan Nacional Multi-sectoral pa Prevencion di Malesa No-contagioso (non-communicable diseases; NCDs).

Minister di Salud y Deporte, Dangui Oduber a splica cu esaki ta importante pa motibo cu 16% di poblacion di Aruba ta sufri di diabetes, mientras mundialmente e indice ta na 8%. Ademas na e momentonan aki tin 200 pashent cu ta dialisa, cada un di nan tin un costo pa AZV di 100.000 florin pa persona, loke ta representa 20 miyon florin, solamente pa dialisis.

Tambe el a señala cu 70% di poblacion tin sobrepeso, di cual 30% ta obeso y tur esaki ta pa motibo cu hende ta keda sin haci nada, no ta haci ningun ehercicio y esey no ta un opcion, segun e minister a comenta. For di investigacion den pasado reciente (2017) ta resulta cu algo mas di 50% di nos poblacion ta consumi fruta regularmente. Solamente 55% di poblacion ta come berdura diariamente.

A pone den e programa cu kier desaroya un Plan Nacional di Prevencion, den cual ta bay cuminsa conscientisa y tuma accion pa cu salud di comunidad, pa asina yega na un comunidad mas saludabel. Oduber a expresa cu ta haci esaki tambe pa garantisa sostenibilidad di fondo di AZV y a desaroya e plan aki hunto cu stakeholder manera departamento di Salud Publico, Imsan, Hospital, AZV, Witgele Kruis, Asociacion di Dokter di Cas, entre otro.

A participa cu e plan lo tin un duracion di 10 aña y cu ta cuminsa e aña aki, specificamente como plan integral unda tur stakeholder na Aruba cu ta activo den salud of cuido medico ta duna nan contribucion.

“Aruba ta un di e prome paisnan den henter Caribe cu tin un Plan Nacional di Prevencion, pa cuminsa bay den direccion di un comunidad cu ta cuminsa biba mas saludabel, conscientisa di kico ta consecuencia di hiba un bida no saludabel, y di no practica actividad fisico. E tendencia ta bisa cu Aruba a bira un pais no saludabel y esaki ta un cambio di mentalidad,” Oduber a sigura.

Tambe el a duna di conoce cu lo crea un Fundacion Nacional di Prevencion cu lo yuda ehecuta e plan aki, hunto cu Departamento di Salud Publico y e otro stakeholdernan, pa cumpli cu e meta final di por mira un resultado positivo. Despues di 2 aña lo evalua si tin cu haci algun ahuste den e plan, cu ta core te aña 2030.

Oduber a manifesta cu lo cuminsa cu diferente campaña pa comunidad bira mas consciente di con pa yega na un bida mas saludabel, loke na e momento aki no ta e caso. P’esey e lansamento di e plan aki ta asina importante. Ta conta cu colaboracion di Pan American Health Organization (PAHO), World Health Organization (WHO) y demas stakeholders.

Oduber a menciona tambe cu lo kier bin cu un clinica di obesitas na Hospital, caminda e persona cu ta obeso of tin sobrepeso por haya ayudo di hende profesional, den un trayecto pa hiba un bida mas saludabel.

Oduber, ken tambe ta minister di Deporte, a trece dilanti cu den e indice di participacion na actividadnan fisico, 50% so di comunidad ta participa activamente na actividad fisico. Pa e motibo aki kier presenta diferente proyecto, hunto cu Ibisa, pa asina stimula participacion di mucha y hobennan na deporte.

Dellanire Maduro, parlamentario di partido POR y presidente di e comision cu ta atende aspecto di area social y salubridad publico, a comenta cu e plan aki ta sumamente importante teniendo na cuenta cu por mira cu causa di morto rond mundo y na Aruba ta mayoritariamente ta di malesa no contagioso.

Maduro a señala cu ta existi fundacion of departamentonan cu ta traha riba nan mes, pero na e momento aki tin cu cuminsa traha hunto pa por ta mas eficaz den area di salud.

Clayton Croes di departamento di DVG a declara cu e departamento ta den e parti tecnico di e plan; e idea ta cu lo tin tres grupo den contacto estrecho cu PAHO, y cu nan tin cu traha un plan bi-anual. Un parti di esaki ta NCD’s den cual DVG ta participa pa guia e diferente gruponan. Tambe tin representante di DVG pa guia e proceso den e parti operacional.