ORANJESTAD – Dia 17 di april venidero, gobierno lo presenta e maneho economico pa nos pais. Minister di finansa y asunto economico, Xiomara Ruiz-Maduro a declara cu pa basta tempo nan tabata trahando pa presenta e maneho aki. Nan a yega di trece esaki dilanti, sinembargo nan mester haci algun ahustacion final.
Segun e mandatario, e ta ‘un maneho fuerte y resiliente’ pa economia di nos pais por tin un base solido. Pero tambe ‘resiliente’ kiermen cu e por wordo adapta facil, na momento cu tin cambio. Nan ta preparando un acto pa e lansamento di e maneho economico aki. Den dje lo presenta un bista di e maneho economico for di 2019 te cu 2022.
Un noticia cu e mandatario ta considera positivo pa economia di nos pais ta e yegada di e tugboat nobo Colorado di Aruba Port Authority (APA), caminda e compania estatal aki a inverti 13 miyon florin. E ta haya cu un boat asina pa por haci e trabou portuario ta un instrumento importante. Pero considerando cu den su diseño di nan plan economico, gobierno di Aruba a presenta seis sector cu nan ta wak cu tin potencial pa diversifica y desaroya nos economia.
Un di nan ta e parti di logistica caminda APA ta resorta, y unda e mandatario ta wak cu lo tin hopi oportunidad pa e trabou maritimo. Nan ta loke e ta yama como ‘sector prometedor’ unda e parti maritimo y e servicio cu e tugboat di APA por ofrece ta un oportunidad cu nos tin como pais pa haci negoshi.
P’esey e mandatario a referi na e sectornan prometedor aki cu ta wordo hinca den nan maneho economico pa asina nan por haya un guia y vision. Segun minister Ruiz-Maduro, pais Aruba a yega di conoce hopi plan, pero nunca a conoce un maneho como esun cu nan lo presenta pronto. Un maneho cu a wordo traha cu e diferente partner comercial di nos pais.
