‘Cu Mira Pa Futuro’, no ta e slogan di niun partido politico. E ta e nomber di e plan innovativo y sostenibel pa desaroyo di e destinacion Aruba cu Oficina di Turismo di Aruba (ATA) a presenta na Renaissance Convention Center ayera.
ATA hunto cu diferente partner, a presenta e plan aki. Tanto CEO di ATA, Ronella Tjin-Asjoe-Croes como Varelie Croes di The Liv Group a elabora riba e trayectorio cu tabatin pa a yega na e formulacion di e plan aki. Di biaha, sra. Tjin-Asjoe-Croes a cualifica esaki como un sesion ‘hopi exitoso’. Igualmente el a laga sa cu un plan aki lo tin su impacto pa nos economia, ya cu e ta percura pa Aruba su industria turistico por sigui genera su contribucion economico alomenos di 1% pa 2% cada aña proximamente.
“Akinan mi kier para un rato. Turismo ta stabiel. Turismo ta un producto fuerte.” Pero e ta haya cu si nos no ta haci cambio structural, turismo su contribucion economico no ta crece e 1% pa 2% cada aña.
E importancia di e plan aki segun CEO di ATA ta cu Aruba ta un producto turistico “relativamente madura”. Pa aña nos ta ofrece Aruba como un destino vacacional y ta importante pa revisa constantemente kico nos ta haciendo. Sinembargo e ta mira cu si nos no ta haci cambionan structural y importante den desaroyo di nos producto, nos lo core e risico di no acapara locual e bishitantenan di awor y di futuro ta demanda di un experiencia vacacional.
El a bisa cu ATA lo lidera gran parti di e accionnan cu e plan ta contene. Pero tambe tin otro instancianan cu por incorpora e accionnan aki facilmente den nan mesun plan di maneho den e añanan venidero locual ta traduci su mes como un compromiso di e partnernan aki.
Den e plan ta wordo describi e accionnan, ken ta lidera e accionnan y ken ta keda responsabel di dje. Pero con esaki ta impacta e desaroyo di e producto turistico tambe. E tabata un trayecto amplio di 10 luna pa bin cu e plan aki cu e participacion di mas cu 350 persona; caminda cada persona a participa mas cu un biaha.
Director di ATA ta bisa cu como parti di e produccion di e plan aki nan a realisa diferente otro analisis pa yega na e producto final. Entre otro, ATA a traha hunto cu un organisacion internacional, Destination Team. Nan ta expertonan den defini y analisa kico ta e identidad di bo producto turistico cu ta e fundeshi di tur nan strategia di comunicacion, el a laga sa.
Plan Mira Pa Futuro
E plan aki ta un documento extenso cu ta enfoca riba diferente prioridad strategico pa cu desaroyo di nos producto turistico. Na aña 2013-2014, ATA a traha nan di dos plan di maneho, y teniendo cuenta cu comunidad nan a dicidi di hunga un rol mas importante pa loke ta trata desaroyo di e producto Aruba. Nan a traduci esaki den accion, y ta asina cu ATA a acerca sra. Valerie Croes di The Liv Group kende a traha como consultant riba e “destination development plan”. E plan tin un total di 5 prioridad strategico parti den 22 metanan di desaroyo di e producto turistico. Nan ta combina cu 90 accionnan concreto riba diferente area, entre nan: innovacion, cuido di medio ambiente, naturalesa y cultura, etc..
Segun sra. Croes e plan aki ta conta cu un participacion amplio no solamente di sector turistico y pero di esunnan cu no ta envolvi den turismo pa asina haya un perspectiva mas amplio riba den ki direccion Aruba mester bay. Tambe e experticio di hendenan riba diferente tereno. Te hasta a wordo teni na cuenta e pensamento di e bishitantenan nan experiencia na Aruba. Tur esakinan a wordo uza hunto cu e pensamento di e comunidad. Nan a organisa diferente sesion den barionan cu tabata habri pa publico y parti di feedback aki ta inclui den e plan aki.
Tabatin hopi similaridad entre loke e bishitantenan kier mira mas cu esun di nos comunidad. Un ehempel di esaki cu ambos ta demanda mas atencion pa nos cultura, proteccion pa nos naturalesa y medio ambiente; proteccion di nos playanan; acomodacion di nos bishitantenan ya sea den boutique hotel y den area cu no ta desaroya ainda como Palm Beach.
Comunidad y ehecucion
Considerando cu e plan aki tin nos menos cu 90 accion ta bon pa e hendenan por mira cual ta e prioridadnan y den cual secuencia lo wordo ehecuta a base di e feedback cu a bin dilanti. Esaki por wordo consulta riba nan website: www.camindapafuturo.com ATA tambe ta carga e parti di monitor e ehecucion di e plan aki. Tambe nan lo ehecuta e partinan cu ta cay bou nan responsabilidad directo como oficina di turismo. Pero e ta recorda cu e ‘plan aki no ta di ATA, sino cu e ta un plan cu mester wordo carga door di comunidad’.
Sra. Croes a expresa su satisfaccion di por a culmina un fase cu e presentacion di e plan aki; pero tambe el a laga sa cu esaki ta e inicio di otro fase cu ta esun di implementacion. Considerando e nomber di e mesun plan ‘caminda pa futuro’, e accionnan contempla den e plan aki lo crea un fundeshi mirando e desaroyo di nos producto turistico aki 5 pa 15 aña. Pero e implementacion ta bay den tres fase, y ya caba otro siman lo cuminsa cu e prome fase di implementacion cu e puntonan di accion cu tin prioridadnan mas halto te cu 2018. Ta bay tin un plataforma cu ta bay controla e ehecucion di e plan aki.
Mirando e cantidad di 90 accion, e ta haya cu e ta un “plan pa progreso” di Aruba su producto turistico. Proximamente nan lo bin cu mas informacion riba con nan lo pone e plan aki den ehecucion den colaboracion estrecho cu comunidad, ya cu e ta haya cu e ta un “plan di Aruba y pa Aruba”.
Fondo pa ehecuta e plan
Encuanto for di unda e fondo lo sali pa implementa e plan aki, sra. Tjin-Asjoe-Croes a splica cu un 80% di nan fondo ta bay pa mercadeo; y e concepto aki nan ta parti den dos: 70% di e total di e fondo di ATA ta bay den mercadeo internacional y 10% cu ta resta ta wordo destina na diferente aspecto cu nan ta inverti na Aruba pa facilita mercadeo internacional. Pero tambe otro tipo di aspecto manera e plan aki cu ta contribui pa desaroya e producto local. Actualmente ATA ta trahando riba nan presupuesto di 2018, y ya caba nan a delinea diferente fondonan cu lo ta directamente dirigi pa ehecucion di e plan aki considerando cu ATA por responsabilisa su mes pa cierto inversion, conforme cu aspecto legal pa cierto parti di e accionnan aki. E otro accionnan carga pa otro partner, ATA su participacion ta mas tanto di guia nan pa medio di bos y no semper e ta mara cu inversion di parti di ATA.
Encuanto e montante di inversion, el a laga sa cu nan a haci algun ehercicionan pero nan ta prefera di no incorpor’e den e plan; ya cu nan tin cu verifica nan prome. Tambe diferente aspecto ta cay bou responsabilidad di gobierno y cu ATA lo pusha pa ta den nan plan di maneho na nivel di diferente ministerio pa nan haya prioridad.
