Seccion di Pesca di Departamento di Agricultura, Cria y Pesca (Santa Rosa) den un comunicado di prensa ta recorda tur piscado cu nan bida ta hopi importante, y ta enfoca riba e seguridad di e piscado.

Ora cu ta temporada di cuaresma pisca ta bira manera oro. Tur hende cu tin e tradicion y/of creencia Catolico cu tur diabierna ta come pisca pa e temporada di cuaresma. Esaki ta conta pa e cuarenta dia di cuaresma. Esaki ta haci cu e demanda pa pisca ta bira ainda mas grandi. Si den dado caso bo sa bishita un piscado pa cumpra pisca lo bo bay ta haya bo cu fila largo di personanan cu ta interesa pa cumpra maske ta un pida pisca pa pone riba mesa. Den mayoria caso tambe cu tin biaha hopi ta esnan cu ta keda cu gana pasobra pisca a caba prome cu nan mes a yega.

Hopi biaha nos tur ta desea di saboria un pida pisca fresco riba mesa, pero nos no ta pensa e trayectoria cu e piscado ta haya su mes aden y mas ainda e peliger cu e ta core na momento di subi lama. Pa e motibo aki, Departamento di Agricultura, Cria y Pesca Santa Rosa hunto cu seccion di pesca ta ofrece consehonan cu ta hopi bon pa tene na cuenta ora di subi lama bay pisca. E consehonan aki no solamente ta yuda prome cu subi lama, pero tambe durante cu bo ta riba lama piscando. Den dado caso algo bay robes riba lama, famia y autoridad por tin un bista cua ta e rumbo cu e piscadonan a bay y tur informacion por ta accesibel corecto pa autoridad of pa esnan cu ta bay haci e buskeda.

Promove seguridad ariba lama;

E meta di e guia aki ta pa promove seguridad ariba lama. “Seguridad riba lama ta responsabilidad di nos tur! Check pa semper bo ta prepara,” ta e lema cu ta usa. Tambe a pone un “check list” di articulonan cu un piscado mester tin den su boto pa su propio seguridad. Tur ta cu e meta pa sigui promove seguridad ariba lama. E documento aki mester ta bibo y keda desaroya cada biaha. Cu esey nos kiermen cu mester sigui agrega na dje, segun nos siña y segun tecnologia desaroya y ekiponan nobo bini disponibel. Pa esaki ta sugeri pa instancianan tene charla y lectura tocante seguridad ariba lama y ta urgi piscadonan pa atende esakinan.

Lo ta bon pa nos recomenda Rode Kruis, of Kustwacht haci un simulacro di un piscado perdi ariba lama un bes pa aña. Tur instancia envolvi lo mester sigui e procedura palabra cu anticipacion.

Si nos tur sigui e recomendacionnan y tambe percura pa e “check list” keda yena, e Piscadonan lo tin un pesca mas sigur y famianan lo keda mas trankil momento cu nan sernan keri sali bay lama. Ban pisca, pero cu seguridad den mente!

Scenario pa caso di emergencia cu piscado

Proceso # 1 (responsabilidad di piscado)
 Na momento di traha plan pa bay pisca, e promer cos ta cu mester haci ta avisa su famia directo/bisiña. Den caso cu e piscado ta biba su so, mester avisa un bisiña of amistad. E informacion mester contene informacion di por ehempel e lugar di pisca of e area general na unda nan a bay pisca, e ora cu bo ta sali bay pisca y ora cu bo tin planea di ta back na pier. Si tin radio abordo, tuma contacto via radio y duna bo GPS of sitio na APA.

Proceso # 2 Famia ta raporta piscado perdi na Kustwacht 913

Ta yama di biaha APA y Kustwacht y bati alarma pa cuminsa cu buskeda. Pa medio di famia autoridad ta haya sa unda e ubicacion di piscadonan ta. Autoridad lo mantene contacto cu famia pa duna informacion di e resultado di buskeda.

Aki e “checklist” ta hunga un rol importante y mihor esaki ta yena cada biaha prome cu piscado sali, mihor e buskeda lo bay. Ta urgi pa yena e formulario mas completo y corecto posibel prome cu sali bay lama.

Proceduranan pa seguridad riba lama:

1: Prome cu bay lama

Check tempo, biento of otro caracteristicanan di lama. Por check cu otro piscado of Meteo su website. www.meteo.aw

Yena e parti di e checklist cu informacion di e boto.

Yena e informacion riba e checklist cu ubicacionnan di pisca y tambe lugarnan alternativa y specialmente laga informacion di con lo contact otro y orarionan di sali y bolbe.

Tuma bo checklist y revisa e parti di ekiponan di seguridad cu ta recomenda y yena esnan cu ta bay cune. Corda cu seguridad riba lama ta bo responsabilidad y percura pa bo tin mas tur ta posibel cu bo. Tambe yena e checklist honestamente.

Percura pa por lo menos un persona competente y di confiansa tin e informacion of sa unda pa haya e checklist den caso di emergencia.

2: Esnan den boto den caso di emergencia:

Semper percura pa un hende na tera sa unda bo ta pisca. Tin diferente tecnologia pa esaki, pero ta importante pa mantene esnan cu a nota riba e checklist. Si mester cambia di esnan cu tin marca riba e checklist, anto mester yama of notifica esun cu ta pendiente di e cambio.

Bati alarma, e promer cos cu bo tin cu haci ta notifica bo posicion y kico ta e problema. Tin diferente nivel di emergencia, dependiendo di e tempo cu bo tin duna mas hopi informacion posibel.

3: Alarma di tera:

Tuma contacto cu autoridad. Kustwacht 913 ta e instancia central pa bay bati alarma. Por bati alarma na cualkier autoridad, pero kustwacht ta esun central.

Kustwacht lo conduci e procedura segun nan protocolnan.

Mas informacion cu tin den e check list e ora mihor pa e buskeda. E promer informacion importante: duna e coordinada di e sitio di pisca. Si bo no tin GPS, menciona e marca of area general di pisca. Nomber di e boto; Number di registracion di Directie Scheepvaart; Tamaño di e boto; Color di e boto, for di bista horizontal; Ki color e boto tin? For di bista di ariba; Cuanto motor e boto tin?; Cual ta e marca di motor y su color?; Ki ora nan a sali bay pisca?; For di cual pier of unda mi boto ta mara?; Cua canal di radio mi ta usa?

Menciona e nomber di e piscado nan abordo di e boto: Si nos cambia di lugar, lo mi raporta via radio na APA.

CHECKLIST PA BOTO DI PISCADO

Abordo di boto tin e siguiente equipo di seguridad:

Salbabida abordo (cuanto)

Suficiente cabuya di anker

Cuanto galon di awa abordo

Radio

Spiel pa duna señal

Compas

GPS

Fluit

First-Aid Kit

Sunblock

Aparato pa paga candela

Tin flare abordo? Cuanto

Flashlight

Otro ekipo di seguridad

Departamento di Agricultura, Cria y Pesca Santa Rosa hunto cu su seccion di Pesca ta haci un apelacion na tur piscado pa ta mas estricto cu nan seguridad riba lama. Percura pa semper prome cu bo sali cu bo boto subi lama grandi tira un bista kico falta den bo boto cu kisas lo bo ta bay tin mester den caso di emergencia.