Plan di produccion di chip di UE tin meta pa baha e dependencia riba Asia

(AP) – Union Europeo a anuncia un plan di 48 biyon euro riba diamars pa bira un fabricante di semiconductor, como un esfuerso di combati nan dependencia riba e mercado Asiatico pa e componente cu ta duna energia na tur cos di auto, pa ventilador na hospitalnan y hasta consola nan di wega.

Den un tempo unda escasez di gasnan natural y Europa su dependencia riba Rusia pa energia ta mustrando riesgonan politico di dependencia economico, e bloke di 27 nacion ta moviendo pa asina mehora nan dependencia economico den e sector critico di semiconductor cu su Chips Act.

“Chip ta den e centro di e careda global tecnologico. Nan ta, claramente, tambe e fundamento di nos economia moderno,” President di Comision Europeo Ursula von der Leyen a bisa. E plan te ainda mester sosten di e parlamento di UE y e estadonan cu ta miembro.

E movida di UE ta bini despues di President Joe Biden su movida di 52 biyon dollar pa inverti den un sector di produci chip nacionalmente pa asina sigura cu mas produccion tuma luga na Merca mes.

Mientras e economia ta mehora despues di e pandemia di COVID-19 durante e aña aki, tin un strobacion den e cadena di suministro di semiconductor. Den Europa, algun consumidor mester warda te cu casi un aña pa por haya un auto pa causa di falta di partinan.

“E pandemia tambe a forsa nos mira con vulnerabel nos cadena di suministro ta,” Von der Leyen a bisa. “Nos a mira cadenanan di produccion henter para completamente.”

“Mientras e demanda tabata keda crece, nos no por a entrega di acuerdo na e necesidad pa causa di e falta di Chip,” el a agrega. Como resultado di esaki, e trabao na e fabrica ta stop, algun fabrica mester a hasta cera temporalmente y empleadonan a keda sin trabao pa falta di partinan electronico.

Semiconductornan ta e microchipnan chikito cu ta e cabes di tur cos, den un variacion di smartphone te cu autonan, y un escasez cu ta keda extende a pone mas enfoke riba e importancia di fabricanan di Chip, mayoria di cual ta basa na Asia y ta provee globalmente.

Von der Leyen a bisa cu Europa su Chips Act lo conecta investigacion, diseño, testnan y coordina inversion di UE y nacional. E plan di 43 biyon euro ta haci uso di fondonan publico y priva y ta permiti e estado ricibi e inversionnan masivo aki di biaha.