ORANJESTAD – Minister di transporte publico, Chris Romero ta consciente di e fenomeno di taxi pirata cu a bira un problema. E demanda pa e servicio aki ta existi pasobra tin un necesidad cu e taxi pirata si ta satisface na un prijs economico.
“Algo asina ta cuminsa ora cu tin un demanda riba algo. Kico ta conduci na esaki? Ta simplemente servicio,” el a bisa.
Un proyecto cu e mandatario a anuncia tin di haber cu un plan di mobilidad cu ta cushinando aworaki, y cu lo tene cuenta cu e situacion di e hendenan aki. Pa medio di e plan aki, den man di TNO, nan lo evalua con lo por ofrece e servicio di transporte barata cu tur hende lo por haya beneficio di dje.
Plataforma
Un posibel solucion pa atende cu e situacion aki ta e introduccion di un app of plataforma digital, pa duna e mesun servicio cu e taxi pirata ta duna. Pero tambe otro tipo di servicio of plataforma, manera Uber, City Taxi, etc… Pa loke ta introduccion di e servicio di transporte Uber , minister di transporte tabata categorico pa bisa cu ‘mientras cu nos ta den gobierno, absolutamente cu no’.
E app aki ta wordo uza pa e turistanan, cu unabes nan ta na Aruba, nan ta cuminsa busca medio di transporte. E app aki lo ta un plataforma den man di departamento di transporte publico (DTP). E servicio aki lo wordo duna exclusivamente pa esun cu tin un permiso pa core taxi otorga pa gobierno di Aruba.
E mandatario a wordo confronta cu e pregunta cu e servicio di taxi ta uno relativamente costoso. Mientras cu pa e hendenan cu generalmente ta haci uzo di e servicio di taxi pirata ta hendenan cu un entrada hopi limita, y cu nan por paga pa un servicio porta-porta pa un prijs mas barata cu e tarifa di taxi legal. E mandatario no ta descarta cu e grupo di autobus tambe por tin un plataforma asina, y no exclusivamente e taxinan. Nan por brinda e servicio buscando diferente persona cu prijsnan mas faborabel pa hendenan mas humilde y limita.
