Ayera mainta den un conferencia di prensa, a bin dilanti informacion tocante e Ley di Plan Mayor cu ta dirigi specialmente na mayornan cu ta bay divorcia pa asina ey crea un areglo di con nan ta bay comparti nan responsabilidad como mayor pa nan yiunan.

Michella Lacle, ken ta fungi como beleidsmedewerker sociaal y presidente di Plan di Mayor, a splica cu e ley aki ta existi caba na Hulanda for di aña 2009, lo cual ta pone cu mayornan cu ta bay divorcia of ta bay separa y tin yiunan menor di edad, ta obliga pa traha un areglo di mayor den un plan di mayor cu ta nifica un documento legal caminda nan ta bay stipula precies con nan ta bay comparti nan responsabilidad como mayor.

Un ehemplo di esaki ta: na unda e mucha ta bay biba? ken ta paga kico? kico ta e religion cu nan ta bay scoge pa nan yiu? Kico ta e tipo di scol cu nan ta bay scoge pa nan yiu? Con mayornan ta comunica cu otro dilanti e muchanan? Tur e aspectonan aki, vooral vakantie, ta hinca den e Plan di Mayor y tambe cuanto e costonan di alimentacion di e mucha ta y con nan ta bay dividi’e.

“No solamente tata ta paga alimentacion, pero mama tambe y tur esey ta hinca den e plan aki y e ta bay ta un documento cu ta bay tin su peso legal,” Lacle a señala.

Den e caso cu un mama no ta casa y e tata a reconoce e yiu y nan a separa di otro, e ta dificil pa pone e tata cumpli cu e mucha pa motibo cu e tin cu bay via un hues y hues tin cu pidi voogdijraad pa haci un investigacion; full un proceso prome cu nan lo yega na un acuerdo pa cu e parti di finansas so, pero esey no ta esun di mas importante manera Lacle a sigura: ta e mucha esun cu tin derecho di wordo cuida y haya amor di e tata y di e mama segun tratadonan internacional.

Segun loke Lacle a sigura, Aruba ta number dos di divorcio na mundo na e momentonan aki na unda estudionan ta indica cu pa aña un promedio di 240 mayor ta divorcia. Esey nan ta duna un otro promedio di 250 mucha cu ta experiencia un divorcio oficial pa aña.

Casi 50% di nan ta biba cu otro, ta haya yiu y tambe ta separa y e ora ey e cifra tambe ta rond di 250 mucha loke ta duna un total di casi 500 mucha pa aña na Aruba cu ta pasa door di esaki.

E Plan di Mayor a wordo institui na 2018 cu un comision di expertonan como Bert Wielenga (Centro Orthopedagogico), Aisca Berkemeyer (Directie Voogdijraad), Sacha Geerman (Directie Sociale Zaken), Yvonne Bermudes (Centro Pa Hoben y Famia), Magaly Maduro (Fundacion Contra Violencia Relacional/ Bureau Sostenemi), Sylvie Eman (Gemeenschappelijk Hof van Justitie), Luc Alofs (Universiteit van Aruba), Desiree Helder ( Central Bureau of Statistics Aruba) y nan a conseha minister di e ley y introduccion.

Den esaki, el a splica tambe cu nan a invita expertonan di Hulanda cu ta traha cu KIES. KIES ta un intervencion cu ta sucede despues di scol y e ta existi for di 20 aña caba, na unda cientificamente el a wordo aproba cu ta efectivo: “nos kier trece Aruba pa haci’e akinan pero cambi’e pa nos cultura,” Lacle a bisa.

Den e sesionnan di KIES intervencion, e muchanan ta siña con pa surpasa nan emocion negativo riba separacion di mayornan; esaki pa entre otro evita conflictonan di lealtad, sentimento di culpa, depresion, evita cu e mucha ta cay atras cu scol, etc.

Aworaki nan ta bay cuminsa cu un proyecto piloto y nan tin pensa di yuda 60 pareha den cada fase di e problema. E prome fase ta ‘win-win’, unda e pareha ainda por sali nan mes for di e problema. Fase dos ‘win-loser’ unda tin un tiki conflicto y por ta nan mester un guia di cinco sesion di mediacion maximo y e fase tres cu ta e etapa cu mayornan ta pleita cu otro. Den esaki, Lacle a sigura cu nan ta bay yuda 20 pareha den cada fase aki.

“Nos no ta bay limita nos mes na esnan cu tin un paspoort Hulandes so, nos ta bay ricibi cualkier nacionalidad pero importante ta pa nan por comunica sea na papiamento, Ingles, Hulandes of Spaño,” el a bisa.

Mañan dia 22 di maart na Hyat Place Aruba, ta bay tuma luga e congreso di Plan di Mayor, unda tur e profesional ta bay papia over di e investigacion cu nan a haci caba, informado kico ta e cifranan di Aruba, con nan a yega na e cifranan aki, con e investigacion a wordo haci, kico mas nan sa di e grupo meta aki y tambe ta bay presenta e programa KIES: con el a traha na Hulanda y kico nan kier puntra na hubentud di Aruba cu un otro investigacion cu nan kier haci. E congreso aki ta bay wordo transmiti via Telearuba.

Nan ta bay tin tres experto den e panel: Doris Canwood, Jurima Bryson, Inge van der Valk y Jacquelijn van der Vijver entre otro, cu for di nan perspectiva di nan profesion ta bay discuti tocante e grupo di meta aki y kico nan ta haya cu mester na Aruba.

Pa finalisa, Lacle a sigura cu door di un estudio haci yama “Quality of the Aruba Life” na aña 2021, a bin dilanti cu un di e problemanan mas grandi na Aruba ta “neglect”, unda e mama y e tata ta lubida di busca nan yiu for scol, muchanan ta bay sin cuminda na scol y hasta tin biaha maestronan ta bisa cu nan ni conoce e tata di e mucha, nan solamente ta wak mama na scol, cu e muchanan ta sufri door cu nan mayornan no ta palabra bon con nan ta ‘spreek af’ pa e cuido di nan yiunan y e muchanan ta bira e victima.