Durante un conferencia di prensa cu a tuma luga ayera Minister di Husticia y Asuntonan Social, Rocco Tjon, a elabora ariba dos topico importante. E introduccion di un medico forensico na Aruba pa yuda cu casonan di abuso sexual y violencia relacional y tambe seguridad di frontera pa combati e fenomeno di personanan cu ta purba drenta Aruba di forma ilegal.

Minister Tjon a informa cu Dr. Latour, pediatra na Departamento di Salud Publico, a wordo scogi pa specialisa como medico forensico pa Aruba. E tarea primordial di e medico forensico lo ta pa asisti den investigacionnan forensico pa loke ta trata abuso sexual y violencia relacional severo. Minister Tjon a señala cu e importancia di esaki ta cu el lo fortifica e investigacionnan penal na momento cu un caso wordo presenta dilanti hues y naturalmente esey lo conduci na e hecho cu lo por duna un persona un castigo mas halto.

El a indica tambe cu ora cu a papia cu tur stakeholders nan tambe a indica cu locual cu ta mas importante ta e investigacion cu ta wordo conduci, y cu e paso concreto aki lo percura pa e investigacionnan cu wordo presenta dilanti hues ta mas solido, e lo fortifica e fluho di informacion y e cooperacion den henter e cadena tambe. Esaki consecuentemente lo conduci na un investigacion mas solido.

“E cooperacion, e fluho di informacion entre Jeugd- en Zedenpolitie, hospital, Directie Voogdijraad, Directie Sociale Zaken, Bureau Sostenemi, Ministerio Publico, algun di e partnersnan lo bay miho”, el a enfatisa.

Minister Tjon a splica cu e proceso cu a tuma luga pa scoge Dr. Latour pa e estudio aki, a cuminsa for di basta tempo pasa ora cu DVG y Family Justice Center tabata sondea e posibilidadnan pa percura cu un medico por sigui e estudio aki. A logra haya Netherlands School of Public and Occupational Health cu ta dispuesto pa brinda e estudio aki.

Vacatura pa e estudio y puesto aki a wordo publica den tur medionan di comunicacion como tambe na Arubahuis y na final cuater persona a solicita y di e cuater personanan aki un persona solamente tabata cumpli cu tur e rekisitonan pa sigui e estudio aki.

El a splica tambe cu Conseho di Minister a tuma e decision aki pasobra e ta bay ta un studieopdracht locual ta garantisa cu ora e persona aki caba su estudio na Hulanda e lo traha pa pais Aruba algun aña y asina por garantisa tambe cu tin e profesional di e specialismo aki pa e siguiente añanan.

“Mi kier enfatisa cu esaki ta un di e tantisimo pasonan cu Gabinete Wever-Croes II a tuma caba y manera ta conoci a aumenta e castigonan maximo y recientemente nos por a wak e frutonan di esaki caminda castigonan relativamente halto a wordo duna na esunnan cu a comete acto di abuso sexual”, Minister Tjon a agrega.

El a remarca tambe cu a introduci diferente metodonan y procesonan di trabou nobo manera meld code, signs of safety, codigo di proteccion caminda a percura pa certifica tur recherchenan y psicologonan den cadena pa aworaki ora un caso wordo presenta, hues por ta sigur cu e personanan cu ta conduci e investigacion aki ta cumpli cu norma- y standardnan internacional.

A busca tambe tur e material nobo pa ekipa e camber di interogacion pa garantisa cu pais Aruba ta cumpli cu e normanan y e caso cu ta wordo presenta ta uno solido. El a menciona tambe cu Family Justice Center ta organisando diferente cursonan y manera ta conoci recien tabatin un curso pa full e veld y el a informa cu na mei ta bay tin curso pa Cuerpo Policial, organisa pa e European Family Justice Alliance.

Por ultimo ariba e topico aki, Minister Tjon a indica cu nan ta sondeando aworaki y segun el a indica probablemente dentro di poco lo bira realidad tambe, ta cu pa prome biaha na Aruba lo introduci un recherche psicologo. E tarea di e psicologo aki lo ta specificamente pa analisa y conseha e departamentonan investigativo, loke ta declaracionnan cu ta wordo duna door di victimanan.

Pa loke ta trata e topico di seguridad na nos frontera, Minister Tjon a recorda cu e siman aki a tuma nota u un lancha cu 11 persona cu tabata purba drenta Aruba di forma ilegal a wordo intercepta, esaki el a atribui na e cooperacion entre e diferente departamentonan cu a duna su fruto.

Minister a continua y a elabora ariba e “Plan van Aanpak Grens Toezicht”. El a splica cu Hulanda a aproba e plan aki, un plan cu a wordo skirbi door di pais Aruba hunto cu Hulanda den cuadro cu e landenpakket. Na november a aproba cuater miyon euro pa ehecuta e plan aki y el a sigui elabora ariba e ehecucion di e plan aki.

El a enfatisa cu e cooperacion entre departamento a wordo intensifica y aworaki ta papia di e radar kamer cu ta wordo ocupa 24 ora pa dia y ta un cooperacion entre e diferente departamentonan manera Kustwacht, Warda nos Costa y Cuerpo Policial y ti e ekipo di vigilancia cu ta haciendo su trabounan tambe.

Minister Tjon a remarca cu den cuadro di e plan aki, nan ta bay enfoca hopi mas ariba e parti investigativo El a splica cu tin fondonan disponibel aworaki pa lanta un departamento multidisciplinario pa loke ta trata inteligencia y informacion y a base di esaki por investiga e network completo, pasobra un persona cu ta bin Aruba mester haya cooperacion di persona aki na Aruba y di e forma ey nan por ataca e parti aki miho tambe.

Pa loke ta trata e parti di conduci investigacionnan, el a señala cu e opspoorings unit, mensen handelen y mensen smokelen di Cuerpo Policial lo wordo amplia a base di fondonan disponibel y lo percura tambe cu tur e partnersnan maritimo wordo conecta na e plataforma aki. “Di e forma aki bo por percura pa e investigacionnan ta miho y ta hacie menos atractivo pa localnan y personanan cu ta biba na Aruba yuda y facilita esunnan cu ta purba drenta Aruba di forma ilegal”, el a agrega.

Minister a informa tambe cu dentro di poco lo introduci y lo enfoca mas ariba e parti administrativo. Esaki, segun el a splica, ta encera cu personanan cu ta emplea trahadonan indocumenta sin e permisonan necesario lo bay haya boetnan halto. El a recorda cu ya caba luna pasa diferente companianan a haya boet, boetnan cu ta yega te na un suma di 75 mil florin. El a menciona tambe cu e luna aki el lo reuni cu tur e departamentonan riba e maneho aki pa asina intensifica esaki.

“Mi ta kere pa aworaki tur hende mester sa cu bo no por emplea personanan indocumenta y di e forma aki nos ta bay hacie menos atractivo. Aworaki ta asina cu ta duna un warning prome, pero e maneho ta bay wordo adapta cu di biaha ta cuminsa duna boet y e boetnan lo bay bira mas halto”, el a menciona.

Minister a enfatisa tambe cu e maneho aki lo bay actua mas fuerte contra hendenan local cu ta facilita persona pa drenta Aruba di forma ilegal y cu ta duna nan estadia ilegal tambe. Ora e personanan aki wordo gara tur e gastonan aki pais Aruba no lo wanta nan mas pero e gastonan ta pasa riba e personanan cu ta yuda e ilegalnan y asina wanta nan responsabel pa esaki tambe.

Por ultimo, Minister Tjon a menciona cu den e parti legislativo, nan ta analisando hunto cu e huristanan pa adapta e ley caminda ta bay haci estadia ilegal na Aruba tambe castigabel pa ley den futuro. “Mi ta kere a base di e pakete di medidanan aki nos lo percura pa brinda un miho defensa contra e fenomeno cu nos ta wordo confronta cune awendia”, el a finalisa.