Gobierno di coalicion a caba di publica nan plan pa e periodo di gobernacion actual. Un documento extenso cu ta duna bastante detaye di e actividadnan cu lo bay desaroya den cada ministerio. Esey ta bon, pero loke falta ta e vision mas detaya con ta yega na tal actividadnan. Ta mira tambe cierto composicion di ministerio cu ta duna e impresion cu tabata un wega Hulandes cu yama ‘grabbelton’ a hunga den reparti cartera. Husticia cu Asunto Social, represion acompaña pa prevencion, ta mustra bunita, pero ora falta placa, kico ta haya prioridad?

Nos ta haya falta tambe di un vision mas coherente pa nos futuro socio-economico. Claro cu nos no a spera otro cu e gobierno nobo ta pone corectamente dilanti tur cos e recuperacion di e pais di e crisis actual economico y e crisis financiero di gobierno mes. Pero aki hustamente nos ta papia di dos cos diferente. E crisis economico pa gran parti ta depende di recuperacion di e unico motor economico cu nos tin: turismo. Esey cu tempo nos lo mira bolbe unda e tabata. Sin embargo, nos no ta mira nada den e plan actual cu ta tira un vista mas dilanti den futuro. Y nos no ta bisa esaki pa critica, mas bien pa ilustra cu nos tampoco no ta mira algo esencial cambia den e modelo economico actual. Basicamente e unico plan concreto cu nos tin ta varios mil camber acerca den sector hotelero den e proximo añanan. Tur lo demas ta mas scuma cu chuculati, tur pa nan motibo. Sea ta refineria, o cannabis, o sectornan ‘innovativo’ liga na cultura, o sector agrario, hunto nan no ta yega na algo relevante pa e volumen cu nos economia tin. Comprende nos bon: no ta bisa cu no mester explora posibilidad, unda cu esaki realisticamente ta posible. Pa loke ta e refineria nos no mester mas estudio, su recuperacion ta imposible y gobierno ta perdiendo tempo envez di bay ‘all out’ pa otro alternativa. Igualmente e proyecto di cannabis, cu no ta move pa motibonan bon conoci, pero laga nan mes convence nan mes. Otro proyecto manera Port City dificilmente ta genera mas poder di compra di exterior y, manera tanto proyecto mester ‘biba riba costia’ di e volumen turistico di e momento. Es decir, placa cu ta gasta na un mall, no ta gasta na otro… Te unda nos kier yega cu ofrece turista oportunidad pa gasta, si nos no tin crecemento turistico pa sostene.

E otro crisis ta esun di nos propio Pais Aruba. Nos no ta bisa ‘di gobierno’ pasobra e no ta toca solamente e mandatario di turno pa resolve, e ta toca nos tur. Loke nos tin nos dilanti ta e necesidad di un reforma drastico di con gobernacion ta opera. Mal gobernacion ta e traba principal pa economia por move, y ademas ta e abuso mas grandi cometi contra e propio ciudadano. Y ta aki nos preocupacion grandi ta. E plan no ta duna nada mas cu e promer formulacionnan timido di e problemanan y nan posible solucion cu nos a mira desde aña pasa den e acuerdonan cu Hulanda y e versionnan di e Uitvoeringsagenda. Y nos no ta impresiona cu e ‘solucionnan’ cu ta ofrece. Por ehemplo, e solucion di e problema cardinal di un aparato publico cu ta carga cu hende pero no ta produci, lo ta na encargo di un direccion nobo, di Innovacion, cu mester bay dirigi e procesonan di IT y tur cos alrededor di esaki. Ban ta serio. Promer tabata e coalicion di corte democristian cu pa 8 aña tabatin un departamento – nunca formalisa – di Innovacion, cu nunca a surpasa nivel di presenta PowerPoint bunita, y nos tin 4 aña di experiencia di e variante geel di mesun actividad. Ta di berdad no kier comprende cu ta necesario trece aden hende cu experiencia grandi den restructuracion di aparato gubernamental, sea local o di exterior? Cu por simplemente pone tur e trabao dificil aki den man di hende cu tin añas ta haci propaganda di ‘innovacion’ sin cu un dia a mira algo concreto sali di nan man? O nos mester mira esaki como un señal cu di berdad no kier reforma y esaki anto ta e pantaya tras di cual e cultura di nepotismo y di privilegio politico ta continua?

Otro muestra di e falta di vision ta e traspaso di Dimas pa ministerio di Labor. E ta zona masha bunita pa bisa cu esaki ta pa agiliza e proceso di otorgamento di permiso, pero e cosnan aki ta separa net pasobra bo kier pa mas par di wowo contempla loke ta pasando. Y esaki ta yama pregunta tambe tocante e otro problema di coordinacion cu a crea awor, unda nos ta bay mira Husticia ta saca stranhero y e otro ministerio ta parti permiso… Tin un motibo pakico no mester separa diferente tarea bao di e mesun ley, den e caso aki e LTU. Den pasado temporalmente e tarea a bay pa otro ministerio (Infrastructura), pa motibo di problema interno den e ministerio e tempo ey. Mientras tanto no ta mira nada ainda di e problema fundamental y esey ta cu mester bin un reorganisacion di e procesonan vital di permiso, y ey ta unda Dimas ta esun mas importante. E impresion general ta keda cu atrobe Aruba ta haya un tremendo pantaya presenta, pero su tras no tin nada sustancial cambiando.